Minister Geoffrey Wever ta presenta na O’STAD Incubators y miembro di Impact Hub Aruba tocante Startersregeling y revitalisacion di Oranjestad

Den cuadro di su vision pa un economia mas resiliente, diversifica y duradero, Gobierno di Aruba, por medio di Minister di Finansa, Asunto Economico y Sector Primario, mr. Geoffrey Wever, ta sigui tuma pasonan concreto pa crea condicionnan faborabel pa iniciativa empresarial y innovacion. E introduccion di e Startersregeling, un di e cuater incentivo fiscal nobo cu Minister Wever a introduci, ta forma parti integral di e enfoke aki, cu tin como obhetivo pa elimina barera fiscal pa negoshinan nobo y stimula inversion den sectornan economico prometedor.

E compromiso di gobierno cu e sector priva local a wordo refleha durante un sesion informativo cu a tuma lugar diasabra mainta ultimo. Impact Hub Aruba, a organisa un evento informativo pa no solamente nan O’STAD Incubators, pero pa tur nan miembronan, caminda a trata oportunidadnan pa establece negoshi den centro di Oranjestad. Den e contexto aki, e plataforma ‘ New Oranjestad’ a wordo presenta como instrumento pa impulsa desaroyo urbano y economico. Minister di Finansa, Asunto Economico y Sector Primario, mr. Geoffrey Wever, a wordo invita pa comparti informacion detaya cu e incubatornan y e comunidad di Impact Hub Aruba encuanto dos di e incentivanan fiscal nobo.

E dos incentivo fiscal cu Minister Wever a dune splikashon tocante di dje ta trata di e incentivo fiscal di “Startersregeling”, y tambe e incentivo fiscal, Begunstigend Beleid pa inversion den Oranjestad, cual tin como meta pa atrea inversion den Oranjestad y tambe pa e desaroyo di propiedadnan den centro di Oranjestad. Durante su presentacion, Minister Wever a subraya cu e Startersregeling no ta un areglo riba su mes, sino parti di un strategia economico mas amplio cu ta dirigi riba fortalecemento di e base empresarial local, creacion di empleo di calidad y pa eleva e nivel di resiliencia economico. Segun Minister Wever, un economica fuerte ta cuminsa cu empresanan local cu tin oportunidad pa crece na manera saludabel, cu disciplina fiscal y cu un enfoke riba agrega balor real pa Aruba y su ciudadanonan. Conhuntamente, tur cuater incentiva fiscal nobo tin como meta pa stimula y facilita comercio y e inversion den Aruba, stimula nos economia y pa crea un centro di ciudad robusto, pa tur ciudadano di Aruba por disfruta di dje.

E Startersregeling ta aplica na empresanan cu kier establece un negoshi den e asina yama sectornan prometedor, segun defini door di Departamento di Asunto Economico, Comercio y Industria. Esaki ta inclui, entre otro, turismo cultural y medico, economia di conocemento, logistica, economia agricola, economia circular y industria creativo. Door di enfoca riba e sectornan aki, gobierno ta stimula y fortalece diversificacion economico y ta reduci dependencia di actividadnan tradicional, contribuyendo asina na stabilidad economico a largo plaso.

Pa empresanan establece desde 1 di januari 2026 den un di e sectornan prometador, e regeling ta ofrece alivio fiscal durante e prome cinco aña despues di fundacion, cu areglonan cu ta mehora liquides y facilita reinversion, manera exencion anual di ganashi te na Afl. 50.000, investeringsaftrek aumenta y posibilidad pa deduci parcialmente prestamonan comercial. Na mes momento, e maneho ta mantene rekisito pa empresa cu ta participa; mester demostra cada aña cu nan ta inverti minimo 15% di nan bruto-omzet den crecemento di e empresa, cu nan tin un nivel minimo di empleo di acuerdo cu nan volumen di actividad, y cu nan ta cumpli cu rekisito di presencia economico real na Aruba.

E conexion entre emprendemento y revitalisacion urbano a wordo enfatisa tambe door di Impact Hub Aruba den e etapa final di O’STAD Incubator. Actualmente, nuebe start-ups ta preparando pa ‘Demo Day’, caminda nan lo presenta nan compania na un panel di hurado y inversionistanan local. Tur e start-upnan aki a completa un trayectoria intensivo di diesdos siman di entrenamento y guia di expertonan di Impact Hub Aruba, Universidad di Aruba, Camara di Comercio y otro profesionalnan den diferente disciplina relaciona cu creacion y crecemento di negoshi.

Segun Minister Wever, iniciativanan manera O’STAD Incubator y e Startersregeling ta complementa otro y ta mustra con maneho economico por wordo traduci den oportunidad concreto pa emprendedornan, specialmente den centro di Oranjestad. E meta final ta pa no solamente crea negoshinan nobo, pero tambe revitalisa e centro urbano, stimula inversion den propiedadnan existente y crea un economia diversifica, dinamico y resiliente.

Cu e enfoke aki, Gobierno di Aruba ta confirma su compromiso cu un desaroyo economico balansa, caminda emprendemento, innovacion y responsabilidad fiscal ta bay man den man. E Startersregeling, cu a drenta na vigor riba 1 di januari 2026, ta representa un paso importante den e caminda pa un economia Arubano mas fuerte, mas diversifica y mihor prepara pa futuro.

Articles

News

Suceso

Corte

Deporte

Salud

Internacional

Minister Geoffrey Wever ta presenta na O’STAD Incubators y miembro di Impact Hub Aruba tocante Startersregeling y revitalisacion di Oranjestad

Cookie Consent