38.000 EMPLEADO TA SEGURA BAO DI PENSIOEN GENERAL (LAP)

February 26, 2026

Ley di Pensioen General (LAP) ta den den un proceso di un revision. Na e momentonan aki tin 38.000 empleado cu ta segura bao di e Ley di Pensien General (LAP) cu a wordo introduci na 2011. E ley aki a wordi introduci den Gabinete Mike Eman I pa motibo cu hopi empleado den sector priva no tabata tin derecho riba un pensioen banda di pensioen di behes (AOV). LAP a worde introduci pa sigura cu doño di trabao y empleado cera un seguro di pensioen pa e empleado.

Despues di a funciona algun aña, Minister President mr. Mike Eman a presidi un serie di dialogo hunto cu SVB y APFA, companianan di seguro y gremionan sindical y comercial pa a evalua e ley y puntonan caminda por realisa mehoracion. E concepto cu a sali for di e delibercionan aki a wordo presenta Dialuna ultimo den un Dialogo Social.

Minister President mr. Mike Eman, Minister drs. Mervin Wyatt-Ras, Minister mr. Wendrick Cicilia y Minister di Economia y Finanzas, mr. Geoffrey Wever hunto cu SVB y APFA a participa na e Dialogo Social cu gremionan y companianan di seguro.

Minister President mr. Mike Eman a presidi e Dialogo Social cu un enfoke riba participacion balansa di tur gremio y stakeholder.

Director di Banco di Seguro Social di Aruba (SVB), ir. Edwin Jacobs, a expresa su apoyo pa e iniciativa di Gobierno pa revisa e Landsverordening Algemeen Pensioen (LAP) dentro di marco di Dialogo Social. Segun Jacobs, e decision pa pone e ley aki atrobe riba mesa pa evaluacion y mehora esaki, ta un paso responsabel y oportuno.

“E hecho cu Gobierno a scoge pa revisa e Ley di Pensioen General den dialogo cu sindicato y sector relevante ta mustra cu ta abierto pa mehoracion y fortificacion di e sistema,” Jacobs a declara.

Segun e director, durante e proceso a identifica espasio den e ley pa haci clarificacionnan, haci e disposicionnan mas comprensibel y fortifica derecho di trahado. Pero e cambio mas significativo ta relaciona cu supervision.

Jacobs a splica cu desde 2011 e ley a drenta oficialmente na vigor, y despues di algun aña di implementacion, a bira evidente cu supervision structural tabata necesario pa garantisa cumplimento y transparencia.

E revision proponi ta formalisa e rol di SVB como supervisor di e Ley di Pensioen General. Esaki ta inclui autoridad pa intercambio di informacion entre companianan di seguro y SVB, permitiendo control mas efectivo riba cumplimento di obligacionnan di dunado di trabou y trahado.

Durante di e Dialogo Social Minister President mr. Mike Eman a comparti un calculacion cu SVB a haci di seguradonan bao di LAP. Ta calcula for di cifranan disponibel cu 38.000 empleado ta segura bao di LAP na e momentonan aki. Eman a mustra cu esaki sigur ta un adelanto hopi grandi compara cu promer cu tabata tin LAP. Pero e ta mustra cu e cantidad calcula cu mester tin un segur di pensioen ta 48.000 empleado. Pa e motibo ey e cambionan den LAP pa por controla cumplimento ta importante.

“Tur trahado tin derecho na un pensioen adicional ariba su AOV, pero tin tambe obligacion pa paga prima corecto y oportunamente,” ir. Edwin Jacobs a enfatisa.

El a agrega cu supervision no ta solamente un mecanismo tecnico, pero tambe un responsabilidad social. Den e contexto aki, SVB lo asumi un rol mas activo den comunicacion y conscientisacion, informa trahado riba su derecho y obligacion bou e ley di pensioen.

Segun ir. Jacobs, e dialogo cu diferente stakeholdernan a confirma cu tin consenso riba importancia di supervision efectivo, transparencia y fortalecemento di sistema di pensioen priva.

E revision di LAP ta forma parti di un proceso mas amplio di Dialogo Social, cu meta di fortalece sostenibilidad financiero y proteccion social pa trahado di Aruba.

Eman a bisa cu e cambio di e ley di LAP ta bay aumenta e suma tambe cu ta establece e criteria ki ora por lanta tur e placa ahora bao di LAP. Awor ta asina cu si un persona a spaar unicamente algun aña y ta haya Afl. 50,== pa luna of menos y por lanta tur e suma ahora. E suma aki ta worde aumenta na Afl. 100, == of mensos e ora por lanta tur e suma ahora. Hopi bes esaki lo kiermen algun mil florin cu por wordo lanta.

Articles

News

Suceso

Corte

Deporte

Salud

Internacional

38.000 EMPLEADO TA SEGURA BAO DI PENSIOEN GENERAL (LAP)

Cookie Consent