Aruba ta celebra 50 aña di su bandera: historia, significado y orguyo nacional

February 25, 2026

Aruba ta marcando un aniversario special na 2026: 50 aña di su bandera oficial, introduci 18 di maart 1976 hunto cu su himno nacional “Aruba Dushi Tera.” E fecha, cu actualmente ta celebra cada aña como Dia di Himno y Bandera, ta un oportunidad pa reflexiona riba e identidad nacional, unidad y nos trayectoria como pueblo.

Pa logra un simbolo cu ta refleha e identidad unico di Aruba, un concurso di diseño pa un bandera a tuma luga na 1976, caminda a ricibi 693 dibuho for di comunidad. Ya cu tabata dificil pa scoge un diseño, a dicidi pa busca ayudo di Flag Research Institute of Massachuset pa medio di Sarah Bollinger. For di varios diseño, cu tabata tin cierto semehansa manera e strea y e strepinan, a keda presenta un diseño. Un diseño cu a laga un impresion enorme y cu significado politico y cultural, a keda acepta y asina e bandera di Aruba a nace.

Den un periodo caminda Aruba tabata pone e base pa autonomia politico y cultural, e bandera a bira un simbolo fundamental di nos identidad distinto for di e bandera colonial anterior.

E caracteristicanan di nos bandera:

Bandera rectangular cu proporcion 2:3.
Den e tercio abou tin tres banchi horizontal geel–blauw–geel, cada un cu hanchura igual na 1/18 di e bandera.
Den e parti ariba na banda robes tin un strea cora regular di cuatro punta cu rand blanco.

Dia 16 di maart 1976, Gobierno di Teritorio Insular di Aruba a aproba oficialmente nos himno y nos bandera. Dos dia despues, riba 18 di maart 1976, e bandera a ser hisa pa prome biaha den Wilhelmina Stadion (awor Stadion Guillermo Prospero Trinidad), hunto cu e interpretacion oficial di “Aruba Dushi Tera”.

Desde cu Aruba a haya su Status Aparte riba 1 di januari 1986, e bandera a bira oficialmente e Bandera di Pais Aruba dentro di Reino Hulandes.

Significado di e color y e simbolonan

Dia 17 di october 2014, e Decreto Nacional di Bandera, Escudo y Himno a ser actualisa (AB 2014 no. 51), pa stipula oficialmente e colornan di Nos Bandera segun sistema Pantone, garantisando consistencia y respet pa nos simbolo nacional.

E bandera di Aruba ta compone di:

• Color Blauw (PMS 279 C)

Ta representa e lama y e shelo cu ta rondona nos isla, simbolo di paz, libertad y speransa.

• Dos liña horizontal geel (PMS 109 C)

Nan ta simbolisa abundancia y prosperidad, incluyendo nos historia economico di oro, aloe y petroleo, mescos cu nos industria y turismo actual.

• Strea cora (PMS 032 C) cu rand blanco (Blanco Absoluto)

E cuatro puntanan ta representa e direccionnan di e compas y e diversidad di nos pueblo.

E cora ta expresa e amor profundo pa Aruba y memoria historico (incluyendo Rooi Frances y e uzo historico di color cora na industria local).

E rand blanco ta simbolisa nos beachnan blanco y e puresa di curason di nos pueblo cu ta respeta husticia, orden y libertad.

Significado nacional y legado

E bandera no ta solamente un simbolo grafico; e ta un representacion di nos identidad, historia y futuro. E ta expresa e caminda cu Aruba a tuma pa bira un comunidad autonomo, uni y orguyoso di su cultura y su pueblo.

Cada 18 di maart, Aruba ta celebra su Dia di Himno y Bandera, cu ta combina festividad cultural, acto protocolario, manifestacion y desfile, pero mas aun ta fortifica e sentido di orguyo di ta Arubiano y hunto ta honra e simbolonan nacional y su historia.

E aña aki, 2026, e celebracion di 50 aña di nos bandera ta bira un aniversario special cu lo fortifica orguyo, rebiba nos historia y un mirada pa futuro, reconociendo e rol di e bandera como un simbolo duradero di union y identidad pa tur Arubiano.

Articles

News

Suceso

Corte

Deporte

Salud

Internacional

Aruba ta celebra 50 aña di su bandera: historia, significado y orguyo nacional

Significado nacional y legado

Cookie Consent