Articles
Aruba y Hulanda ta precura pa logra un acuerdo riba ley di Reino Dia 1 mei 2025
Prome Minister Evelyn Wever-Croes actualmente ta na Hulanda pa trabou pa atende varios reunion importante pa Aruba. E enfasis di e biahe di trabou ta pa delibera riba e rijkswet cu lo significa un reduccion di interes di e debe di covid. Pa trata e rijkswet y otro temanan di relevancia, Prome Minister a reuni cu Secretario di Estado di Relacionnan di Reino señor Zsolt Szabo.
RIJKSWET
Durante e reunion a conclui cu Hulanda ta hopi satisfecho con e negosacion ta bayendo te na e momento aki y tur e progreso cu a logra. A delibera riba e diferente puntonan di relevancia den negosacion. Na final di e reunion tanto Aruba como Hulanda ta optimista cu lo logra yega na entrega e rijkswet na nos parlamentonan pa e fecha di 1 di mei 2025. Esaki ta un noticia hopi positivo pa Aruba. Cu e rijkswet e interes cu Aruba ta pagando di e debe cu Hulanda lo baha di 5.1% cu e ta actualmente, pa 3.4%, y cu e posibilidad di interes di 3.4% tambe riba e debe di prome cu pandemia.
E trabou di e negosacion lo continua y lo sigui traha duro, manera ta bin ta haciendo pa logra un consensus pronto.
OTRO TEMANAN
Durante e reunion cu señor Szabo a toca otro temanan di relevancia, por ehempel e maneho nobo na Merca. Aki e Secretario di Estado tawata interesa di kico por ta e efectonan pa Aruba a base di e medidanan cu e gobierno nobo na Merca a tuma. Riba esaki Prome Minister a dun’e un splicacion extenso riba e diferente scenarionan . Tambe e Secretario di Estado tawata interesa den e situacion na Aruba di e formacion di gobierno.
Prome Minister:
“Durante tur e reunionan cu mi tin na Hulanda mi ta elabora riba e stabilidad financierio di nos pais. Y e importancia pa mantene e stabilidad financiero aki den e tempo nos dilanti. A trata di otro bon reunion, pero e mas importante ta cu Hulanda tambe ta convenci cu ta posibel pa yega na un acuerdo y pa esey nos ta sigui traha pa por logra esaki pa dia 1 di mei 2025”.
