Na Wageningen Prome Minister Mike Eman ta enfatisa balor di crea un economia di conocemento y proteccion di naturalesa pa futuro di Aruba

May 21, 2026

Gobierno ta habri caminda nobo pa conocemento y sostenibilidad den region

Hopi entusiasmo na Hulanda pa cooperacion entre Wageningen University & Research cu Aruba

Durante e bishita oficial di delegacion di Aruba diahuebs mainta na Wageningen University & Research (WUR), e director general nobo di Environmental Sciences Group, André van Lammeren, a expresa gran entusiasmo tocante e posibilidad pa fortalece cooperacion structural entre Aruba y Wageningen. Den encuentro cu Prome Minister mr. Mike Eman, a dialoga riba e oportunidadnan pa amplia investigacion cientifico, innovacion y aplicacion practico di conocemento den area manera naturalesa, biodiversidad, agricultura y sostenibilidad.

Prome Minister Mike Eman a comparti entusiasmo tocante e siguimento cu ta duna na e Memorandum of Understanding (MoU) firma recientemente entre Aruba y WUR, cu meta pa explora e posibilidad di establece un presencia academico y cientifico di WUR na Aruba.

Segun Prome Minister Mike Eman, e bishita a confirma e interes mutuo pa fortalece cooperacion den diferente area strategico relevante pa Aruba su futuro sostenibel.“Pa nos tabata hopi importante pa hasi un siguimento riba e MoU cu nos a firma cu Wageningen Aruba den presencia di Minister-president Rob Jetten algun siman pasa. Nos ta mira cu tin entusiasmo grandi di parti di e directiva di WUR y cu nan ta mira e oportunidadnan concreto den Aruba y den nos region,” segun Prome Minister Mike Eman. Durante e encuentro, a dialoga riba diferente sector caminda Wageningen University & Research (WUR) por aporta conocemento y innovacion, manera den agricultura, maneho di naturalesa, proteccion di ecologia, siguridad di alimento y desaroyo sostenibel. Prome Minister Mike Eman a enfatisa cu Aruba tin e oportunidad pa posiciona su mes como un centro di conocemento den Caribe y Sur America, haciendo bon uzo di e reputacion internacional cu WUR ta brinda. “WUR ta reconoci mundialmente pa nan conocemento den agricultura, den proteccion di naturalesa y den recuperacion di ecologia. Awe nos a mira cu WUR ta entre e universidadnan mas prestigioso den mundo. Si nos logra stablece un sucursal di WUR Aruba, nos lo trece un nombre grandi, hopi conocemento y oportunidad nobo pa Aruba,” Prome Minister Eman a declara.

Segun e Prome Minister, colaboracion cu Wageningen University & Research por yuda Aruba desaroya un vision a largo plazo pa crecimento economico den balans cu proteccion di naturalesa y sostenibilidad ambiental. E tambe a referi na diferente iniciativa local cu ya ta mustra resultado positivo, incluyendo proyectonan di restauracion di coral y innovacion ambiental. “Tur experiencia cu nos tin na Aruba y cu ta resulta exitoso, por bira un producto pa exporta. Proyecto di coral, por ehempel, ta mustra resultado impresionante. Tur dia nos ta mira e coralnan creciendo, y e proyecto ta bira un ehempel importante di con Aruba por combina innovacion, naturalesa y desaroyo sostenibel,” Prome Minister Mike Eman a indica.

Na su turno André van Lammeren, director general nobo di Environmental Sciences Group na WUR ta admira e potencial cu nos isla por brinda e region. “Tin hopi entusiasmo pa sigui explora hunto con nos por haci esaki bira realidad. E entusiasmo cu nos ta mira tanto na Prome Minister Mike Eman como tambe na WUR ta realmente inspirador,” André van Lammeren a expresa. Segun Van Lammeren, e vision ta bay mucho mas leu di solamente educacion academico. E ta enfoca tambe riba aplicacion practico di conocemento y investigacion pa logra impacto concreto den comunidad y den medio ambiente. “E no ta trata solamente di conocemento y estudio fundamental. E ta trata tambe di con nos ta aplica e conocemento y estudionan realisa en practica pa realmente mira cambio y resultado concreto,” el a comenta.

Durante e reunion, un di e tema principal tabata e proyectonan di restauracion di coral cu WUR y Aruba ta desaroyando hunto.“Nos ta mira actualmente con nos por mehora e coralrifnan. Nos a haci experimento hopi exitoso pa laga e coralnan crece bek. Pa nos esey ta hopi importante, pasobra nos ta siña con e proceso ta funciona y nos ta mira e resultado den practica,” Van Lammeren a splica. E director di Environmental Sciences Group a enfatisa tambe cu e vision di Prome Minister Mike Eman tocante balansa entre economia y proteccion di naturalesa ta totalmente den liña cu e filosofia di WUR. “Mi ta contento cu e tema di balansa entre economia y e ambiente unda nos tur ta biba ta ocupa un lugar importante den agenda. Bo no por laga desarayo economico bay na costo di naturalesa ni biodiversidad. E balans ey ta esencial,” el a declara. Segun Van Lammeren, a pesar cu Wageningen ya tin mas di dies aña colaborando cu Aruba den diferente proyecto, e posibilidad di un establecimento permanente na Aruba lo marca un paso historico den e cooperacion. “En realidad, nos ta presente na Aruba pa hopi aña caba. Nos a traha hunto cu e profesionalnan di Aruba den diferente proyecto. Pero un presencia permanente lo ta un “milestone” hopi importante. Nos ta apenas na cuminsamento di e trayecto, pero naturalmente nos kier mas asina lihe posibel,” Van Lammeren a indica.

Gobierno di Aruba ta continua trahando pa posiciona Aruba como un centro regional di innovacion, sostenibilidad y economia di conocemento, aprovechando colaboracion strategico cu institutonan internacional di alto prestigio manera Wageningen University & Research.

Turista Americano ta fayece den Accidente di UTV na Black Stone Beach

Castigo di añas di prison exigi pa grupo cu a haci 3 atraco cu violencia riba un dia

Chauffeur sin rijbewijs cu a dal peaton y core bay dilanti Hues Hues a ordena pa laga sospechoso den caso droga liber Hues a declara liber homber sospecha di a abusa di mucha menor di edad

TEAMARU den preparacion pa Weganan Suramericano SantaFe2026

Carlos Santiago OLY a comparti hopi conocemento di e plataforma “Athlete365”

Noticia Internacional 7 Januari 2026 Compilacion di entrada militar di Merca na Venezuela y reacciona di di venezolanonan Rond di mundo Regimen di Nicolas Maduro a cay

Tension entre Merca y Venezuela ta keda aumenta Noticia Internacional 21 November 2025

Articles

News

Suceso

Corte

Deporte

Salud

Internacional