Articles
Caso Last Call di nobo dilanti Corte Superior
Ayera e sospechoso I.M.P. (21 aña) den e caso Last Call a presenta dilanti Corte Superior di Husticia. E caso ta trata di homicidio di e mucha muher Sayuri Petronia, kende a fayece riba 4 di juni 2021 despues cu P. a los tiro riba dje cu un arma di candela.
E perdida di Sayuri a laga heridanan profundo cerca su famia y den comunidad di Aruba. Su tata ta sali regularmente den publicidad pa pidi atencion pa e caso y pa expresa su dolor. Ministerio Publico tin consideracion pa famia di Sayuri, cu tin derecho riba reconocimento y respet.
E sospechoso P. tabata menor di edad tempo di e sucedido:
- Na aña 2022, den forma di excepcion, hues a conden’e segun Ley Penal pa adulto. El a wordo condena na un castigo di prison di 9 aña y TBS ku obligacion di internacion, pa motibo di homicidio, varios intento di asesinato, robo cu violencia y menasa.
- Den apelacion na aña 2023, Corte Superior di Husticia a keda sin haci excepcion y a condena e sospechoso segun Ley Penal pa hoben. El a haya un castigo di 4 aña di detencion pa hoben y cu imposicion di medida PIJ.
- Ministerio Publico a bay den casacion na Corte di Casacion contra e decision aki, pa motibo cu e combinacion di castigo ta explicitamente exclui segun Codico di Ley Penal. Na 2024 Corte di Casacion a anula e decision di Corte Superior (di aña 2023), pero unicamente e parti cu ta trata e imposicion di castigo. Pues esey ta e parti importante cu Corte Superior di Husticia ta trata awe.
· Tin dos pregunta crucial pa contesta:
1. e sospechoso mester wordo castiga segun Ley Penal pa hobennan, manera e regla principal ta prescribi?
2. of e mester wordo castigo segun Ley Penal pa adultonan, den forma di excepcion?
Castigo tin varios meta, incluso vengansa.
Vengansa ta nifica cu comunidad y famia ta wordo reconoci pa e daño cu nan a sufri.
Esaki por scucha claramente den e palabranan di tata di Sayuri, kende semper a enfatisa cu ni si e sospechoso haya un castigo di bida largo, lo compensa pa perdida di su yiu.
Pero ora di impone un castigo, mester tuma den consideracion e persona di e sospechoso.
· Kico esey ta nifica pa un sospechoso manera P.?
Pa un sospechoso manera P. esey ta nifica cu un castigo di prison so no ta suficiente, pasobra e tin un trastorno severo di personalidad cu ta hiba na comportacion violento y un riesgo halto di recidiva.
Den e tipo di casonan aki, un tratamiento forensico specialisa ta necesario pa evita cu e sospechoso, despues di a sinta su castigo (no importa con largo esaki por ta) bira un peliger di nobo pa sociedad.
E problema na Aruba ta cu pa tanto e medida di TBS komo e medida di PIJ no tin ningun clinica forensico. Esaki ta representa un gran reto pa proteccion di comunidad.
Ministerio Publico a argumenta cu Ley Penal pa adulto ta aplicabel. Mirando e seriedad di e caso y e riesgo halto di recidiva, Ministerio Publico ta considera necesario pa Corte Superior di Husticia impone tanto un castigo di prison como un medida. E exigencia ta: 8 aña di prison, combina cu un medida di TBS ku obligacion di internacion.
Corte Superior lo dicta sentencia riba 17 di december 2025.
