Aruba ta rindi homenahe na Julio Bernardo Euson cu mural special en conexion cu Celebracion Nacional

March 16, 2026

Como parti di celebracion di 40 aña di Status Aparte y 50 aña di Himno y Bandera di Aruba, San Nicolas lo acoge un acto special di homenahe na un di e cantantenan Arubiano mas reconoci internacionalmente: Julio Bernardo Euson.

E ceremonia lo tuma lugar 17 di maart na Chocolate City Bar & Restaurant, caminda lo presenta oficialmente un mural dedica na su trayectoria musical y su aporte na cultura di Aruba. E acto cultural ta forma parti di e agenda protocolar di e celebracion nacional.

Durante entrevista, Euson a expresa su sorpresa y gratitud pa e homenahe. E reconocimiento tabata algo cu e no tabata spera.

“Tabata un sorpresa grandi pa mi. Mi a bin Aruba recientemente pa bishita mi ruman cu tabata malo di salud, y despues mi a tende cu tin un plan pa honra mi persona. Esaki ta algo cu mi ta aprecia hopi mes,” Euson a comenta.

E cantante a recorda cu durante su carera internacional, e semper a keda fiel na su origen Rubiano, mencionando Aruba tur caminda cu el a presenta su talento.

“Ora hende puntra di unda mi ta bin, mi semper a bisa: mi ta bin di Aruba.”

Un legado musical cu a pone Aruba riba mapa

E trayectoria di Euson a cuminsa den añanan sesenta, ora el a decide di laga Aruba pa sigui su soño di bira un cantante internacional. A pesar cu hopi hende tabata pensa cu esaki no tabata posibel pa un artista for di Aruba, el a persisti cu determinacion.

Su prome paso musical tabata cu e grupo Creole Cats, caminda el a supera su timidez pa subi escenario pa prome biaha. Segun Euson, e momento cu el a tende e aplauso di publico, tabata decisivo pa su futuro como artista.

“Mi tabata sa mesora cu esaki tabata mi destino,” el a recorda.

Orguyo di famia y amigo

Pa e famia di Euson, e homenahe ta un momento hopi significativo.
Su ruman Russell McDonald a expresa cu e reconocimiento ta algo cu e famia a aprecia profundamente.

Segun McDonald, Euson semper a representa Aruba cu orguyo durante su carera internacional.

“E semper a carga Aruba su nomber cu orguyo tur caminda el a bay. Nos como famia ta sumamente orguyoso di dje,” McDonald a expresa.

El a agrega cu e homenahe tambe ta importante pa generacionnan mas hoben, pa nan por conoce miho e legado di Euson y su contribucion na musica.

“Hopi hoben awendia no sa tur cos cu el a logra. E reconocimento aki lo yuda nan conoce su historia.”

Su sobrina Grace Marsdin tambe a expresa orguyo pa e reconocimento cu lo presenta na San Nicolas, indicando cu pa e famia ta un momento emotivo pa mira cu Aruba ta honra e legado di Julio Euson despues di tanto aña di dedicacion na musica.

Amistad musical di mas di 40 aña

Entre esnan cu a forma parti di e carera musical di Euson tin e pianista Adolfo Selman, cu a conoce Euson na Chile durante añanan ochenta ora e tabata biba aya y a forma un grupo musical.

Selman tabata e pianista di e grupo y hunto nan a haci diferente presentacionnan den Santiago y otro regionnan di Chile.

Segun Selman, den e tempo aya hopi hende na Chile no tabata conoce Aruba ainda, pero Euson semper tabata papia cu orguyo di su pais natal.

“Julio semper tabata conta nos di Aruba cu hopi amor. Pa nos tabata un lugar casi imaginario, pero e tabata describi Aruba como un luga special.”

Selman a bishita Aruba varios biaha pa presentacionnan musical hunto cu Euson den añanan ochenta, y a expresa cu bolbe Aruba despues di tanto aña ta un momento special.

“Bolbe Aruba ta un soño pa mi. Aruba a bira un luga hopi importante den mi bida, tanto profesionalmente como personalmente.”

El a agrega cu musica tin un poder unico pa conecta hende di diferente pais y cultura.

“Musica ta un idioma universal. No ta importa di unda bo ta bin, musica semper ta conecta hende.”

Un homenahe cultural pa Aruba

E mural dedica na Julio Euson ta simbolisa no solamente su carera musical, pero tambe su rol como embahador cultural di Aruba den exterior. Durante su carera, el a contribui na pone Aruba riba mapa cultural y musical den diferente pais.

E acto di homenahe lo reuni famia, amigo, musiconan y miembronan di comunidad pa celebra su legado y su contribucion na cultura Arubiano.

Pa Euson, e momento ta uno di profundo significado personal.

“Mi ta sumamente honra di por ta aki na Aruba pa comparti e amor cu famia, amigo y pueblo di Aruba.”

E homenahe di 17 di maart na San Nicolas ta forma parti di e celebracion nacional, resaltando e importancia di cultura, musica y historia den identidad di Aruba.

Vuelo 870 di American Airlines ta haci Aterisahe di Emergencia

Castigo di añas di prison exigi pa grupo cu a haci 3 atraco cu violencia riba un dia

Chauffeur sin rijbewijs cu a dal peaton y core bay dilanti Hues Hues a ordena pa laga sospechoso den caso droga liber Hues a declara liber homber sospecha di a abusa di mucha menor di edad

Carlos Santiago OLY a comparti hopi conocemento di e plataforma “Athlete365”

Noticia Internacional 7 Januari 2026 Compilacion di entrada militar di Merca na Venezuela y reacciona di di venezolanonan Rond di mundo Regimen di Nicolas Maduro a cay

Tension entre Merca y Venezuela ta keda aumenta Noticia Internacional 21 November 2025

Articles

News

Suceso

Corte

Deporte

Salud

Internacional