Un modelo economico di speransa como vision, segun Balkenende & Buijs

Den e Common Good Expo cu lo bai tuma lugar dia 30 y 31 januari benidero tambe lo bai hiba palabra sr. Jan Peter Balkenende (ex-premier di Hulanda) y sr. Govert Buijs (filosofo & economista), autornan di e buki “Capitalism Reconnected” (despues referi como; e autornan). Segun nan buki un economia di speransa lo pone balornan Europeo, sostenibilidad, conexion entre e generacionan, conexion entre e ser humano cu naturalesa central pa asina por reemplasa capitalismo cu e enfoke principal pa logra un economia renoba, inclusivo y inovativo cual su base lo ta for di cinco diferente pilar.

E autornan ta constata cu capitalismo actual ta faya door di falta di atención riba termino largo pa desaroyo, husticia social y medio-ambiente. Segun e autornan nos mision mester ta pa desaroya un economia di speransa cu ta enfoka su mes riba balornan humano, circularidad y inclusividad como alternativa pa e capitalismo Mericano. Un di e pilarnan cu ta pone hopi atencion na dje ta e creacion di laso/conexionan nobo entre e generacionnan. Segun e autornan e generacionan cu tawata y ta na poder a duna menos balor na solidaridad pe generacionan nobo. Adicionalmente nan ta señala cu poco atención a wordo duna na e futuro generacionan ora ta trata di e repartición di beneficio y carganan pero tambe den mesun rosea e generacionan anterior no a wak e importancia pa tuma decisionan na tempo pa asina por garantisa un bienestar amplio pa e generacionan c uta sigui. Cu otro palabra tawata carece di un bon antepasado. Den e cuadro aki mehora e relacionan entre e generacionan di pasado, actual y futuro ta wordo considera esencial, esaki kiermeen pa nos por yega eynan mester amplia nos perspectiva cu e punto di bista saliendo for di e bienestar actual bayendo pa un bienestar mucho mas amplio den futuro.

Un otro manera cu ta wordo señala cu lasonan nobo ta necesario ta entre diferente grupo social den nos comunidadnan cu no ta haya oportunidadan igual. E autornan den e contexto aki a enfatisa cu ta existi e riesgo di tin un separacion entre gruponan den comunidad cataloga como ganadornan y otro banda perdedornan. Esaki ta impulsa pa e pensamento cu exito ta basa of ta posible solamente riba merito propio den cual ta pone cu cada biaha e gruponan ta distancia nan mes mas for di otro. Ta papia di un miedo pa faya cual tambe ta manifesta su mes den e clase media cualnan hopi biaha tin acuerdonan laboral insigur y of cu ta experiencia discriminacion riba e mercado laboral. Logra progreso cada biaha ta bira difícil pa logra. Door di e autornan ta wordo enfatisa cu e mesun miedo aki ta crea polarisacion den comunidad, cual ta por ehempel cu tanto e trahado y e doño di trabo cu ta experiencia perdida di control riba futuro y nan manera di biba. Pa por ehempel por contra-aresta esakinan e ta bai rekeri un implementación di un pakete integral y coherente pa e mercado laboral.

Loke tambe ta wordo menciona como un pilar pa yega e resultado ideal di un economía di speransa ta e conexion necesario entre e ser humano cu e naturalesa. E limite di loke nos planeta por wanta ya ta den bista for di hopi tempo caba. Ta wordo remarca cu nos sistema economico ta exigi mas di loke nos tera por soporta. Den liña grandi ta papia cu mester mas conexión entre e hende cu su naturalesa, principalmente un otro manera con ta trata cu entre otro materia prima y energía.

E conferencia di e “Bon Comun” tambe ta duna nos naturalesa su balor y lugar den nos desaroyo pa futuro. Den cuadro di esaki un profesional local, Francielle Laclé como Economista ambiental cu enfoke riba terenonan di sostenibilidad y desaroyo social tambe lo ta un di e oradornan den e Common Good Expo conhuntamente cu sr. Jan Peter Balkenende y sr. Govert Buijs. Den su charla Laclé lo ta elaborando riba e desaroyo inclusivo pa naturalesa. E temanan aki y mucho mas lo wordo trata den e Common Good Expo cu lo tuma lugar dianan 29 y 30 januari na Seaport Conference Center. E invitacion ta bai na pueblo en general pa asisti na e dos dianan di conferencia.

Articles

News

Suceso

Corte

Deporte

Salud

Internacional

Un modelo economico di speransa como vision, segun Balkenende & Buijs

Cookie Consent