Minister Geoffrey Wever: Prome ronda digital di E-LOFA cu resultado solido pa fortalece capacidad financiero

March 25, 2026

Minister di Finansa, Asunto Economico y Sector Primario, mr. Geoffrey Wever, a informa Parlamento di Aruba riba resultado positivo y progreso continuo di e programa Leergang Openbare Financiën Aruba (E-LOFA), un iniciativa clave den cuadro di Landspakket Tema A Financieel Beheer, cu ta enfoca riba fortalecemento di e columna financiero di gobierno pa garantiza cu Aruba ta y sigui “in control” di su finansa publico.

E prome ronda di e modulo basico digital a cuminsa dia 1 di december 2025 y a conclui dia 6 di maart 2026, marcando un transicion importante di un formato tradicional, pa un plataforma digital moderno y accesibel via Directie Financien. Resultado di e prome ronda ta confirma impacto directo, unda 99 empleado di gobierno a participa for di un maximo capacidad di 100, mientras 68 participante a logra completa e programa cu exito. Ademas, pa stimula calidad y desempeño halto, participantenan cu un resultado di 80% of mas a ricibi un gratificacion financiero di Afl. 500.

E modulo basico di E-LOFA ta brinda un introduccion integral den maneho di finansa publico di Aruba, incluyendo legislacion financiero, ciclo presupuestario y rol di instancianan di control manera CAD y ARA. E programa ta un instrumento esencial pa integracion di personal nobo y pa educacion continuo di asesor di maneho y funcionario financiero, contribuyendo na uniformidad, eficiencia y disciplina den maneho financiero di gobierno.

“Digitalisacion di LOFA no ta solamente un paso tecnologico, sino un inversion strategico den continuidad di conocemento y profesionalisacion di e sector publico,” segun Minister Wever.

Gobierno ta sigui construi riba e base aki cu preparacion pa un di dos ronda di e modulo basico, permitiendo mas empleado participa, y cu introduccion di e prome modulo specialisa “Wettelijk Kader”. Den e siguiente fasenan, lo añadi modulo adicional riba proceso di maneho, ciclo di presupuestario, operacion empresarial, 3 Lines Model y Policy Based Budgeting, fortaleciendo mas ainda e capacidad institucional.

Minister Wever a enfatisa: “E resultado di e prome ronda ta mustra cu tin compromiso real den nos aparato gubernamental pa sigui mehora. Nos no ta papia solamente di reforma, nos ta implementa y logra resultado concreto.”

E desaroyo di E-LOFA ta alinea directo cu e prioridadnan di Programa di Gobernacion AVP-FUTURO 2025-2028, cu ta pone enfasis riba fortalecemento di finansa publico, modernisacion di gobierno via digitalisacion y e-government, y mehoracion di eficiencia, transparencia y bon gobernacion . E programa ta representa un ehecucion concreto di e vision di un gobierno cu ta basa su decisionnan riba conocemento, structura y responsabilidad.

Cu E-LOFA, Aruba ta sigui duna paso firme pa un sistema financiero moderno, confiabel y transparente, unda inversion den conocemento ta traduci den decisionnan mas responsabel y un futuro economico mas solido pa tur ciudadano. Gobierno ta confirma cu profesionalisacion no ta un opcion, sino un condicion esencial pa progreso duradero di Aruba.

Vuelo 870 di American Airlines ta haci Aterisahe di Emergencia

Castigo di añas di prison exigi pa grupo cu a haci 3 atraco cu violencia riba un dia

Chauffeur sin rijbewijs cu a dal peaton y core bay dilanti Hues Hues a ordena pa laga sospechoso den caso droga liber Hues a declara liber homber sospecha di a abusa di mucha menor di edad

Carlos Santiago OLY a comparti hopi conocemento di e plataforma “Athlete365”

Noticia Internacional 7 Januari 2026 Compilacion di entrada militar di Merca na Venezuela y reacciona di di venezolanonan Rond di mundo Regimen di Nicolas Maduro a cay

Tension entre Merca y Venezuela ta keda aumenta Noticia Internacional 21 November 2025

Articles

News

Suceso

Corte

Deporte

Salud

Internacional