Articles
Hues ta declara sospechoso di a sende dos auto na candela declara liber
E conoci di Polis, M.I.M.(40) a presenta dilanti Hues pa e caso penal cu Ministerio Publico a cuminsa contra dje. Fiscal a acusa M.I.M. di hunto cu un otro, a cende 2 auto na candela na San Nicolas. TELENOTICIA por a compronde cu Fiscal a exigi 3 aña di prison, mientras cu M.I.M. ta para riba cu e no a haci nada. Abogado mr. Mohamed a mustra cu no tin prueba. Hues a conclui cu enberdad no tin prueba y a declara M.I.M. liber.
CENDE AUTONAN NA CANDELA
E acusacion cu Fiscal a presenta den Corte contra e homber M.I.M.(40) ta cu riba 13 April 2024, hunto cu un otro, intencional a sende dos auto na candela. Esaki a sosode na San Nicolas y na opinion di Fiscal, esaki a causa peliger pa otro autonan y casnan cu tabata keda den cercania.
SOSPECHOSO A NENGA
Hues a mustra cu doño di e autonan, V., a bisa Polis cu e tabatin problema cu un homber G. Ta asina cu M.I.M. a nenga categoricamente, cu el a cende auto na candela. El a bisa Hues cu si e haci algo, e ta admiti cu el a haci’e. El a bisa cu no por pon’e den zapato di G. El a bisa Hues cu den KIA e tabatin problema cu G. Hues a bisa cu segun e raport di Polis, V. a bisa cu e ta reconoce M.I.M. riba e video di seguridad. Polis tambe a reconoce M.I.M. riba video. Ta asina cu M.I.M. ta un conoci di Polis.
Segun M.I.M., Polis ta bay tras di a tende pero pakico no ta bin cu esnan cu ta papia. Hues a dicidi di pasa e video di camera caminda ta mira 2 persona ta cana bay na e autonan. Un di nan tabata bisti na blanco y e otro na preto. Hues a bisa cu segun Polis, esun na blanco ta M.I.M. M.I.M. a reacciona cu esey no t’e. El a bisa cu riba e video e persona ey por ta cualkier otro hende. Hues a puntra Fiscal unda e otro sospechoso G. ta. Fiscal a splica cu no por a reconoce G. riba video y pesey no a cuminsa caso contra dje.
Ta asina cu M.I.M. a bisa Hues cu e ta un persona peligroso. Segun M.I.M. el a cambia su bida. El a casa y tin un yiu muher cu ta bay haci 18 aña. El a bisa cu su yiu muher ta sufri di curazon y mester bay haci operacion na Hulanda. Hues a puntra M.I.M., di con e no a bisa Polis tur esey. M.I.M. a bisa cu na Polis e no ta bisa unda e ta biba pa Polis no bay molestia na su cas y afecta su yiu muher. El a bisa cu el a baha man na usa piedra di cocaina. E ta usa marihuana y cocaina.
FISCAL A EXIGI 3 AÑA DI PRISON
Fiscal a bisa Hues cu Brandweer a traha un raport cu ta mustra cu un Nissan y KIA tabata na candela y un veranda di un cas, a sufri daño di candela. Na opinion di Fiscal, e homber V. a mustra for di e camera di seguridad cu ta M.I.M. y un otro a cende e autonan na candela. Un agente di Polis a mira e video y a reconoce M.I.M. di biaha. Fiscal a sigui bisa cu M.I.M. ta un conoci di Polis y tin carchi di castigo masha largo. Fiscal ta haya legalmente proba cu M.I.M. ta complice di cende auto na candela. Fiscal ta haya cu esaki ta un caso hopi serio. El a bisa cu danki Dios cu tur cos a sali bon cu no tabatin morto y casnan y otro autonan no a kima. Fiscal a exigi 3 aña di prison di cual 1 aña ta condicional cu 3 aña di prueba.
ABOGADO TA HAYA CU NO TIN PRUEBA
Abogado mr. Mohamed a bisa Hues cu un agente di Polis cu a mira e video ta bisa cu e ta reconoce M.I.M. E abogado a remarca cu ariba e video, apenas ta mira e cara di e dos hendenan. Ademas Polis ta bisa cu a reconoce M.I.M. na e manera di cana y tattoo na man. Abogado a bisa Hues cu riba e imagennan, no por mira tattoo y ta cuanto hende tin tattoo na man. E abogado a remarca cu Polis no ta bisa nada di G.
Mr. Mohamed a mustra cu Polis ta papia di un amigo, cu a keda anonimo, cu lo a topa M.I.M. y cu M.I.M. lo a bis’e di a cende e auto na candela. E abogado ta haya cu no por reconoce riba video e cara di M.I.M. Mr. Mohamed ta puntra, kico lo tabata e motibo cu M.I.M. a cende auto na candela. El a bisa cu M.I.M. a bisa cu e ta reconoce ora e haci algo malo. Den e caso aki e ta para riba cu e no tin nada di haci cu e caso aki. E abogado ta haya cu no tin suficiente prueba cu ta M.I.M. ta complice y mester declar’e liber.
M.I.M. a bisa Hues cu e tin 8 luna sera pa e caso aki, sin cu tin prueba.
HUES A DECLARA HOMBER LIBER
Hues a sera tratamento di e caso y a dicta sentencia di biaha. El a bisa cu ta solamente video tin pa prueba contra M.I.M. Hues a bisa cu e videonan no ta mucho cla. Hues a mustra cu e persona V. a bisa di a reconoce uno na su forma di cana. E no ta bisa ta ken. Tin e agente di Polis cu tambe ta bisa di a reconoce M.I.M. na su forma di cana y tattoo. Hues a bisa cu el a mira e videonan y nan no ta mucho cla. No por mira cara di M.I.M. y no por mira tattoo. Hues ta haya cu no tin mucho prueba cu ta M.I.M. ta e culpabel. Hues a declara M.I.M. liber.
