E crisis di autoridad for di e perspectiva di professor Verbrugge (parti I)

Nos ta na caminda pa presencia y experencia na fin di Januari un di e conferencianan cu mas impacto por tin riba nos comunidad cu e topico di e Bon Comun. Durante e conferencia aki varios orador lo hiba palabra incluyendo sr. Ad Verbrugge, autor di e buki titula “De Gezagscrisis”. Sr. Ad Verbrugge ta un professor di Filosofia Sociaal Cultural y Filosofia Economico na Universidad Vrije Universiteit na Amsterdam. E intencion di e comunicado aki ta pa den liñanan grandi elabora riba algún aspecto como introduccion di su buki, anticipando e conferencia y kizas motivabo pa lese.

Den e introduccion di su buki e ta indica cu un grupo grandi di ciudadanonan ta sinti cu nan no ta wordo scucha y mira mas pa e partido politiconan tradicional. E ciudadanonan no solamente ta critica e esfera político pero mayoría biaha ta mira y mustra den dirección di esnan “elite” di e comunidad. Enfasis ta wordo poni riba e echo cu awendia ciudadanonan cu palabranan contundente ta expresa nan mes via medionan social. Mientrastanto crisis ta sigui acumula tur caminda. E ta indica cu hasta ta parce cu na cierto momento riba e tereno social, solamente di crisis so ta wordo papia. Remarcabel ta cu Verbrugge ta indica cu division riba tereno social y politica den combinacion mes ta ocasiona crisisnan nobo.

Otro aspecto cu e ta bai riba dje ta cu ciudadanonan ta desconfia den instancianan tradicional y cu e structuranan di autoridad a bira instabil. Banda di tur e crisisnan existente e ta subraya cu nos ta confrontando tambe un crisis di autoridad real. E la indica ora ta trata di problematicanan actual manera vivienda, educación y energía cu gobiernonnan mes ta responsabel pa perdida di nan autoridad. Según punto di bista di Verbrugge, e palabra “crisis” mes ta wordo usa den un forma exagera den su respectivo contexto, pa algo cu antes simplemente lo a wordo jama un problema of reto. Si nos reflexiona riba e ultimo aki, nos por wak e ta biba den e política y desaroyonan social-economico serca nos na Aruba tambe.

Loke e ta indica tambe ta cu politica den cierto situacionnan ta probecha y malusa e sentimento di “crisis” pa purba legitimisa of hustifica decisionan y medidanan. A pesar di esaki e ta pensa cu e ta apropia den cuadro di e situación socio-politico pa por papia di un “crisis di autoridad”. Den su investigación e ta elabora den ki sentido tin un “crisis di autoridad” enfatisando cu e base di e estado di derecho democratico-liberal ta na peliger. E la subraya cu no ta e ta e unico persona cu ta señalando cu e institucionnan (di por ehempel) e estado di derecho di Hulanda ta desintegrando. Como ehempel a mustra riba e caso relaciona cu e toeslag pa kinderopvang unda cu violacion di derechonan fundamental di estado di derecho a tuma lugar. E la indica den e caso aki cu tanto e poder legislativo, ehecutivo y hudicial a faya gravemente den e manera con a trata e ciudadanonan Hulandes pasobra enbes di wordo cuida nan a wordo acusa y sanciona disproporcionalmente.

E articulo aki no tin intencion pa repasa e buki y investigacion completo di sr. Verbrugge pero si pa intriga ciudadanonan pa forma parti di e conferencia di e Bon Comun. E expectativa ta cu e conferencia lo ta un impulso pa nos ciudadanonan ta mucho mas comprometi cu e “Common Good” di nos pais.

Articles

News

Suceso

Corte

Deporte

Salud

Internacional

E crisis di autoridad for di e perspectiva di professor Verbrugge (parti I)

Cookie Consent