AHATA: Nos ta participa den dialogo cu tin proceso rasonabel y productivo

February 24, 2026

AHATA a nota cu Minister President a publicamente bisa varios biaha cu AHATA of “hotelnan” no kier dialoga cu gobierno. Nos kier aclarea e cantidad di conversacion y comunicacion cu a tuma lugar entre e asociacion y e Ministerio di Asuntonan General desde cu gobierno nobo a sinta.

Aki ta un lista cronologico:

Durante prome siman di juni 2025, tur gerente di hotel a sinta un pa un cu Minister President y AHATA pa scucha su deseonan.

Despues Minister President a invita e gerentenan hunto pa un dialogo (sin mucho aviso) y avisando cu e topico principal lo tabata e deseo pa un pausa den desaroyo di camber di hotel.

AHATA, den 3 reunion tras di otro cu Minister President, a splika cu nos ta alinea riba e meta pero cu gerente di hotel no ta tuma decision riba desaroyo di camber. A duna conseho pa gobierno sinta cu e inverstionista cu a ricibi permiso legal di gobierno pa traha kamber. Ademas AHATA a enfatisa cu mester inclui desaroyo di condominio den e esfuerso pa pone un pause na desaroyo.

Riba otro topiconan di dialogo, AHATA a informa cu un dialogo real y sincero ta basa riba participacion di diferente partido di comunidad den e decision riba: topico, lista di participante, fecha di reunion, y temporada di preparacion. AHATA ta alinea cu Minister President riba e metanan pa un mihor Aruba, pero ta desea un proceso democratico pa dialogo y kier evita un proceso unilateral.

Na augustus 2025 AHATA a manda un propuesta pa e proceso di dialogo nacional, y a ricibi contesta cu e Ministerio ta di acuerdo cu e proceso recomenda.

Asina mes a bolbe ricibi invitacion pa un dialogo cu a organisa unilateralmente di parti di ministerio, y AHATA a bolbe manda un carta na october 2025 pa ripiti e sugerencia pa un proceso productivo y democratico.

Pa sigura cu ta demostra deseo pa dialoga productivamente, Hunta di AHATA a invita Minister President pa nan reunion di december 2025. Durante e reunion Minister President a confirma cu tabatin un acuerdo pa un proceso di planea hunto, y cu lo cuminsa e proceso ey.

Mientrastanto, AHATA, y mas gremio, a participa den un proceso separa di dialogo riba un topico especifico (ley di pensioen general) na augustus 2025. Siman pasa e mesun grupo cu a participa den e dialogo a ricibi un invitacion di un dia pa otro pa un “Dialogo Social” cu 5 documento pa lesa y cu 5 topico riba agenda. Hunto cu varios otro gremio, nos a laga sa cu nos ta pidi tempo pa lesa e documentonan prome cu mester drenta un reunion. Ademas, nos conhuntamente a pidi pa participa den determina topiconan riba agenda si ta desea di organisa un “dialogo social”.

AHATA semper a keda consistente den su posicion di ta dispuesto y honra pa dialoga y nos ta convenci cu nos peticion pa un proceso democratico y productivo ta rasonabel. Pa tin dialogo exitoso, mester tin un ambiente di confiansa y respet mutuo.

Riba topico separa di Palapa, nos tin hopi tempo ta pidi pa reunion y ta puntra kiko ta pasando cu e proceso pa yega na un Beach Policy nobo. Contesta nos ta haya di hopi tempo ta cu sector publico ta trahando riba dje, y despues nan lo sinta cu stakeholders. Nos ta respeta e proceso y ta respeta cu beach ta publico. AHATA a pidi un reunion cu e minister encarga como introduccion y pa conversa riba varios tema, incluyendo e pleitamento pa palapa cu ta tumando lugar entre bishitante. E intencion ta pa yuda cu solucion cu ta mantene e derecho di tur local riba beach publico y alabes ta evita pleitamento entre bishitantenan di cruiseship, vacation rental, y guest di hotel pa sombra. Nos meta comun mester ta pa evita cu hende mester pleita pa tin proteccion di solo fuerte.

Cu tur e experiencianan aki, nos no ta compronde e acusacion di ta evita dialogo. Simplemente ta pidi pa papia cu representante corecto y pa tin un proceso corecto. Ta hopi lamentabel ora politico y gobernante ta skohe di antagonisa comunidad contra e sector hotelero en bes di busca solucion pa yega na un turismo controla y paz riba nos isla.

Nos mester agrega cu desde comienso di e gobierno actual, nos a forma parti di varios reunion productivo cu diferente Ministerio, y nos ta aprecia e oportunidad cu cada Minister a ofrece pa conversa y yega na comprencion mutuo pa sigura bienestar general di nos pais. Nos ta keda dispuesto pa participa den reunion y dialogo cu ta basa riba un proceso rasonabel y respetuoso, sin antagonismo.

Articles

News

Suceso

Corte

Deporte

Salud

Internacional

AHATA: Nos ta participa den dialogo cu tin proceso rasonabel y productivo

Cookie Consent