Articles
Aruba Fair Trade Authority (AFTA)
AFTA ta e autoridad independiente y imparcial di Aruba cu ta supervisa bon funcionamento di mercado y cumplimento cu e reglanan di competencia cu ta para den e Ordenanza encuanto Competencia (Mededingingsverordening). E reglanan di e Ordenanza encuanto Competencia ta na vigor desde 1 di januari 2024.
AFTA ta investiga mercado na Aruba y ta actua pa evita acuerdo cu ta limita competencia entre empresa, y abuso di posicion di poder economico, y unda ta necesario ta castiga esaki. Esaki ta importante, pasobra empresa den mercado competitivo ta haci nan maximo esfuerso pa satisface necesidad di consumido. Esaki ta fomenta prijs mas abao, mas escogencia, miho calidad y innovacion di producto y servicio pa e consumido. Empresa ta probecha di un ‘level playing field’ y un miho clima di inversion. Empresa nobo ta haya miho oportunidad sin obstaculo innecesario pa nan acceso. E resultado pretendido cu esaki ta crecemento economico y mas prosperidad na Aruba.
AFTA ta autorisa pa exigi informacion y pa impone multa, multa coercitivo y/o instruccion obligatorio. Tambe AFTA por conseha gobierno, segun peticion y pa propio iniciativa, tocante e funcionamento di mercado y consecuencia pa competencia di regulacion existente y pa regulacion den preparacion.
Interesado por entrega un peticion pa mantencion di ley cerca AFTA. Por ehempel, si un empresa tin e experiencia cu un empresa competido ta viola un di e reglanan di competencia, por pidi AFTA pa tuma accion. Notificacion den forma di señalamento, keho, peticion pa excension o notificacion di fusion, take-over o joint venture pa cual tin intencion, ta keda registra y acepta pa tratamento pa evalua si ta inicia un investigacion. Por entrega notificacion anonimamente via website. Esnan cu haci notificacion cu dato di contacto den e notificacion ta ser informa tocante e tratamento. Na 2024 a ricibi 60 notificacion..
Pasobra AFTA tin recurso humano y recurso material limita, mester haci escogencia y establece prioridad. Ta determina prioridad a base di un evaluacion entre recurso humano y otro recurso disponibel, y e contribucion cu por haci na economia di Aruba, y en especial e consumido Arubano. Mas grandi e contribucion ta, mas halto e prioridad. E prioridadnan di AFTA na 2024 tabata informacion encuanto e reglanan nobo, intermediario di propiedad inmobil (‘makelaar’) y producto alimenticio.
Mirada Retrospectivo den 2024
Informacion
Na 2024 AFTA a organisa 16 reunion informativo pa tanto ciudadano como empresa, pa conscientisa nan di e oportunidad y limitacionnan di e reglanan nobo. Casi tur gremio empresarial na Aruba a ser acerca pa participa na un o mas presentacion, unda na cada sector a duna atencion specifico na regulacion cu pa nan tabata relevante.
Banda di esey AFTA tabatin 24 encuentro separa cu empresa y organisacion individual pa profundisa mas den e impacto specifico di e legislacion den nan operacion empresarial. AFTA a mantene un website y un facebook page, facilitando cu di diferente manera empresa por a informa nan mes tocante e reglanan di competencia. P’esey cu ta anticipa cu empresa awo por boluntariamente cumpli cu e reglanan di competencia. Den caso cu tin necesidad di splicacion general y/o pregunta tocante un situacion specifico, AFTA ta mas cu dispuesto pa atende esey.
Intermediario Inmobil (Makelaar)
E ‘Commission Guidelines’ di Association of Aruban Realtors (AAR) tabata contene ‘guideline’ cu tabata limitante pa competencia di prijs entre intermediario (makelaar), loke desde 1 di januari 2024 a base di e Ordenanza encuanto Competencia ta prohibi. Tocante e posibel conflicto den e guidelinenan di AAR cu e Ordenanza encuanto Competencia, AFTA a ricibi señal for di mercado. Pa motibo di esey AFTA a inicia un investigacion y a pidi informacion na AAR. AAR a suministra e informacion rapidamente y despues di un entrevista cu AFTA, a dicidi di revoca e guidelinenan aki di inmediato, cu cual e limitacion di competencia di prijs a keda elimina. AAR a comunica e revocacion di e guidelinenan na su miembronan. Esey ta faborabel pa consumido y empresa cu ta haci uzo di servicio di intermediario. Pa via di e pronto colaboracion di AAR, e revocacion inmediato di e guidelinenan efectua pa AAR y e tempo cortico desde e vigencia di e Ordenanza encuanto Competencia, AFTA a para su investigacion tocante AAR y su miembronan y no a impone sancion.
Producto Alimenticio
E relevancia di un mercado pa producto alimenticio funcionando bon y competitivo, cu ta percura pa prijs mas abao posibel pa tur Arubano, ta evidente. Mas o menos mita di e hogarnan di Aruba (esunnan te na e minimo di subsistencia) ta dedica 40% di nan presupuesto mensual disponibel na alimento. Esey ta hopi mas cu famia na Merca (14%) y Hulanda (19%) cu entrada comparabel. Prijs halto pa alimento tin anto un efecto directo riba e nivel di prosperidad di un gran parti di e comunidad Arubano. P’esey AFTA na 2024 a implementa un investigacion tocante prijs y structura di mercado den e sector di producto alimenticio na Aruba. Na september 2024 AFTA a publica e resultado di e investigacion aki. E investigacion ta confirma e percepcion cu prijs di alimento na Aruba en comparacion cu Merca y Hulanda ta hopi halto. A base di e conclusionnan AFTA a dicidi pa inicia dos investigacion di continuacion. Un investigacion dirigi na convenio exclusivo di distribucion y un investigacion di transporte di container pa Aruba.
Concesion di frecuencia pa telefonia mobil
Fin di mei 2024 Ministro di Asunto Economico, Comunicacion y Desaroyo Sostenibel a pidi AFTA, a base di articulo 4.8 di e Ordenanza encuanto Competencia, duna conseho tocante e posibel efectonan di competencia den e modelo di compensacion proponi pa Stratix, pa uzo di frecuencia pa telefonia mobil 5G na Aruba. A base di e peticion pa conseho, e rapport di Stratix, entrevista cu e partinan involucra, entre nan SETAR, Digicel, DTZ y Stratix, y a base di documento suministra pa Digicel y SETAR y e contestanan di Digicel y SETAR riba pregunta haci pa AFTA, AFTA a duna su conseho na november 2024, cu recomendacion pa e reparticion di e espacio di frecuencia pa telefonia mobil. E consehonan den e rapport aki ta dirigi na fomento di e competencia riba mercado pa telefonia mobil. E conseho a keda publica riba website di AFTA.
Prioridadnan 2025
Pa 2025 AFTA ta duna prioridad – continuando tambe e trabao cu na 2024 a tuma lugar – na e prijs pa servicio bancario, contrato exclusivo den sector di producto alimenticio, transporte di container pa Aruba, investigacion encuanto cumplimento di makelaar y proteccion di consumido.
Servicio bancario
Durante prome aña di AFTA (2024) a drenta mas señal cu ta concerni e banconan comercial. Un preocupacion grandi pa empresa ta e aumento di tarifa pa transaccion via debit y credit card. Ta trata en especial di Visa Debit y Matercard Debit, e sucesor di Maestro, unda ta existi e impresion cu e tarifanan pa transaccion di pago ordinario (debit) a aumento fuertemente. E aumento aki lo afecta e consumido si empresa calcula e aumento den e prijs di nan producto y servicio, cu consecuencia negativo pa economia Arubano y e poder di compra di consumido. Fin di 2024 AFTA a inicia un investigacion tocante e tarifanan cu banconan na Aruba ta cobra pa nan servicio, y en especial e tarifanann cu ta cobra empresa y consumido pa e trafico di pago na Aruba. E banconan a ricibi peticion pa informacion den cual ta haci pregunta y ta rekeri documento. Den caso cu e banconan duna bon cooperacion cu e investigacion, AFTA ta spera di tin suficiente informacion den prome lunanan di 2025 pa por inicia un raportahe tocante su constatacion. Pasobra e motibo pa e preocupacion ta concerni MasterCard, AFTA lo dirigi un peticion pa informacion na MasterCard tambe. Na november 2024 Ministro di Asunto Economico, Comunicacion y Desaroyo Sostenibel a haci un peticion na AFTA pa, a base di articulo 4.8 di e Ordenanza encuanto Competencia, raporta tocante regulacion pa cual tin intencion di introduci, esta: ‘Landsverordening toezicht op betaaldienstverleners en landsverordening toezicht op aanbieders van betaalsystemen (Ordenanza encuanto supervision di suministrador di servicio di pago y Ordenanza encuanto supervision di suministrador di sistema di pago). Tan pronto cu e proyectonan di ley aki ta den poder di AFTA, lo planifica e investigacion necesario y lo elabora e raportahe peticiona cu prioridad. AFTA den esey lo dirigi su mes principalmente na efectonan di e ordenanzanan pa competencia.
Contrato exclusivo
AFTA a dicidi, a consecuencia di e ‘investigacion encuanto prijs y structura di mercado den e sector di producto alimenticio na Aruba’, implementa na 2024, pa entama un investigacion continua encuanto efecto convenio di distribucion exclusivo, acorda pa productor (di marca) y/o comerciante (por mayor) exportador cu importador, mayorista y supermercado cu ta activo den mercado di alimento na Aruba.. Na Aruba, convenio di distribucion exclusivo ta permiti, a menos cu esey tin como meta o consecuencia cu ta limita competencia. Un convenio di distribucion exclusivo ta un forma di convenio vertical cu hopi biaha ta cera entre productor o proveedor, y distribuidor o importador. Den esaki ta conveni acuerdo tocante entrega, condicion di licencia y condicion di benta. Convenio di distribucion exclusivo por tin tanto bentaha como desbentaha. Obhetivo di e investigacion continua ta entre otro pa haya un bista den: - caracter, alcance y caracteristica di convenio di distribucion exclusivo na Aruba; - e bentaha y desbentahanan di e convenionan di distribucion exclusivo y; - caracter y alcance di efecto negativo como consecuencia di e convenionan aki, o di conducta relaciona cu esaki, manera por ehempel prijs mas halto of obstruccion di importacion paralelo, cu no ta prohibi. Importador y mayoristanan na fin di 2024 a ricibi peticion cu pregunta pa por yega na e conocimento necesario. AFTA den esaki ta anticipa cu reaccion riba e preguntanan lo conduci na peticion nobo pa informacion. Den caso cu e colaboracion di esnan involucra den e investigacion aki keda bon durante e investigacion, AFTA ta spera di por entrega un rapport como producto di e investigacion aki, e aña aki.
Transporte di container
For di e investigacion antes menciona encuanto producto alimenticio, a resulta cu 57% di alimento ta importa for di Merca. A resulta cerca tur e partinan entrevista cu pa importacion for di Merca, un solo empresa di transporte di container ta nabega e ruta directo pa Aruba y cu e prijs pa transporte di container ta halto y volatil. Esaki ta a causa di desaroyo global tambe, pero tambe pa e hecho cu Aruba ta exporta masha poco, di manera cu containernan ta sali practicamente bashi for di Aruba. Importador en realidad no ta paga un ‘one way ticket’ pa importacion di mercancia, pero mester paga un ‘two way ticket’ mientras e container ta sali bashi. E fenomeno aki ta keda hinca den e prijs final pa servicio y producto. Pero por tin otro causa tambe.
Obhetivo di e investigacion encuanto cumplimento ta entre otro obtene contesta riba e siguiente preguntanan:
- Con e posicion den mercado di King Ocean ta influencia e prijs final di transporte di container y cu esey e productonan na Aruba;
- Kico ta e bentaha y desbentahanan (economico) pa partinan cu ta depende di King Ocean;
- Tin posibilidad alternativo di transporte riba e ruta aki y si ta asina, con nan ta competi cu King Ocean. Si no, pakico esey nan no t’ey (mas);
- Te unda otro compania maritimo di transporte di container ta inclina o ta dispuesto pa nabega e ruta aki;
- Te unda desaroyo global den transporte maritimo ta splica e tarifanan di transporte di King Ocean cu ta subi continuamente, contra e tarifanan di transporte di competidonan cu ta nabega pa economianan isleño comparabel;
- Te unda ta trata di conducta di limitacion di competencia (manera abuso di posicion di poder y/o di acuerdo limitante pa competencia) di parti di King Ocean;
A acerca King Ocean na december 2024 pa contesta pregunta y suministra informacion y documentacion. Na 2025 AFTA lo raporta tocante su constatacion.
Investigacion cumplimento intermediario propiedad inmobil (makelaar)
Como consecuencia di entrevista intensivo cu AFTA, e Association of Aruban Realtors (AAR) a dicidi na inicio di april 2024 pa revoca su ‘Commission Guidelines’, loke tabata un paso importante den mehoracion di e relacionnan di competencia entre intermediario na Aruba. A consecuencia di e cambio aki, consumido cu ta cumpra un vivienda na Aruba, no ta mara mas na tarifa acorda entre nan pa intermediario. Nan tin e posibilidad awo pa negocia nan costo di intermediacion o hasta busca un otro intermediario cu ta ofrece tarifa mas abao, loke ta amplia e oferta di escogencia y transparencia pa cumprado considerablemente. Te unda lo tabata trata di negociacion, kico e efecto di esey lo tabata y ki desaroyo e tarifanan a experencia desde e terminacion di e Commission Guidelines lo ta obheto di investigacion na 2025. Den esey lo tin atencion tambe pa posibel conducta di intermediario cu ta limita competencia.
Proteccion di Consumido
Tin legislacion den preparacion – ordenanza encuanto mantencion y cumplimento den derecho administrativo di proteccion di consumido - (landsverordening bestuursrechtelijke handhaving consumentenbescherming) pa mantene cumplimento den derecho administrativo di proteccion di consumido. AFTA, por medio di e ordenanza aki ta bira e instancia cu ta responsabel pa esey. Mantene cumplimento di derecho di consumido ta encera actuacion disciplinario contra conducta prohibi di empresario. Efecto di esey ta mas confianza di consumido, escogencia informa y eficiente di consumido, menos competencia desleal y miho funcionamento di mercado. E punto di salida di e proyecto legislativo ta cu AFTA ta actua pa mantene ley segun derecho administrativo, si ta trata di un (posibel) infraccion colectivo di derecho di consumido. AFTA lo no actua den cuadro di infraccion individual, pero den caso di infraccion cu por perhudica derecho di mas consumido. Ta anticipa cu pa mita di 2025 el ley por drenta na vigor. AFTA ta haciendo e preparacion necesario pa despues di vigencia di e ordenanza por cuminsa cu duna informacion. Mirando cu e derecho di consumido (otro cu e derecho encuanto competencia) no ta nobo na Aruba, no tin obstaculo pa AFTA di inmediato despues di e entrada na vigor di e ordenanza, banda di informacion tambe desplega actividad den cuadro di e supervision di cumplimento y mantencion di ley.
