Articles
Chauffeur sin rijbewijs cu a dal peaton y core bay dilanti Hues
Corte di Husticia a trata e caso penal cu Ministerio Publico a cuminsa contra e homber S.T. E ta wordo acusa di a dal e homber Croes cu auto y core bay. Door di e impacto, e homber Croes a bay cay riba otro banda di caminda y dos auto a pasa riba dje cu consecuencia cu el a fayece.
TELENOTICIA por a compronde cu S.T. a bisa Hues cu el a spanta y a core bay. Hues a confirma e castigo exigi pa Fiscal y a condena S.T. na castigo combina.
DAL HOMBER CU AUTO Y CORE BAY
E acusacion cu Fiscal a presenta contra S.T. ta cu riba 2 December 2024, el a ocasiona un accidente y core bay lagando e victima den un situacion desampara. Tambe cu S.T. no tabatin rijbewijs.
Hues a bisa cu e accidente a sosode 7.30 di anochi riba e caminda principal di Oranjestad pa San Nicolas. E sospechoso S.T. a dal e peaton homber Croes. Door di e impacto, Croes a bay cay riba otro banda di caminda y dos otro auto a pasa riba Croes cu a causa cu el a fayece. Hues a bisa cu esaki tabata un accidente tragico. Fiscal a bisa Hues cu S.T. ta wordo acusa di door di su culpa, pero Fiscal no ta hay’e culpabel di a ocasiona e accidente sino di a core bay despues di e accidente y no tabatin rijbewijs.
CORE SIN RIJBEWIJS
Hues a puntra, pakico S.T. a core auto sin rijbewijs. Segun S.T., e tabata bayendo na un amigo na San Nicolas. Hues a remarca cu S.T. no por core auto sin rijbewijs. Hues a bisa cu rijbewijs ta un prueba cu bo por core auto den trafico. Den e caso aki, S.T. no por core auto pasobra e no a pasa ningun test. Hues a mustra cu S.T. a yega di pasa examen di rijbewijs pero no a logra. Hues a mustra cu anterior S.T. a haya multa di 650 florin pa tabata core auto sin rijbewijs.
Hues a bisa cu e riesgo di core sin rijbewijs ta trece cun’e cu ora bo haya bo den un accidente, e ta castigabel y cu aseguro lo no cubri nada. E culpabel mester paga tur gasto.
A SPANTA Y CORE BAY
Hues a puntra S.T. si e por bisa kico a sosode. S.T. a bisa Hues cu tabata mas o menos 7.30 di anochi y e tabata bayendo San Nicolas. Diripiente el a sinti cu el a dal contra algo. El a mira den spiel y no a mira nada. El a spanta y a sigui core. El a bisa Hues cu ta promer biaha cu e ta pasa den algo asina y ta dificil pa papia di e accidente pasobra ainda e situacion ta traha riba dje. Hues a bisa cu segun e relato di Polis, S.T. a bisa cu el a spanta y no por a kere cu hende ta cruza caminda riba un caminda asina scur. El a core bay na un amigo y a bis’e cu el a dal contra algo. E amigo a bay check riba media y a mira cu S.T. a dal un hende riba caminda y cu e hende a fayece. E momento ey S.T. a pensa cu e ta den hopi problema. Hues a sigui bisa cu ta Polis a bay busca S.T. y cu S.T. a laga e auto serca un amigo. Segun S.T. e tabata baña pa bay Polis. Hues a remarca cu ta hopi casualidad cu ora Polis a bay pa detene S.T., e ta bisa cu net e tabata bayendo Polis. Hues a mustra cu 8 December 2024, 6 dia despues di e accidente, Polis a detene S.T. Hues a bisa S.T. pa e papia e berdad pasobra e no ta kere cu ta manera S.T. ta bisa cu e tabata pa bay Polis. Segun S.T., el a papia cu su mama y tabata planea pa bay Polis.
CHAUFFEUR AWOR TIN RIJBEWIJS
Hues a puntra S.T. kico e ta pensa awor di loke a sosode. S.T. a bisa cu e ta lamenta loke a sosode. Hues a puntra S.T. si e tin rijbewijs. S.T. a bisa Hues cu algun luna pasa el a haya su rijbewijs. Ta asina cu Hues a bisa S.T. cu e kier mira e rijbewijs. S.T. a bisa cu e tin’e den auto. Hues a pospone e caso pa S.T. bay busca su rijbewijs den auto unda S.T. a lag’e. Ora S.T. a bolbe a sigui cu e caso caminda S.T. a mustra su rijbewijs na Hues.
Hues a bisa cu S.T. a wordo deteni dia 8 December y 25 December 2024, el a wordo laga liber.
FISCAL
Fiscal a bisa Hues cu e ta haya S.T. ta culpabel di a core bay na Pos Chiquito despues di dal un hende. Un testigo a mira e auto y a duna na Polis tur informacion. Asina Polis a bin haya S.T. A resulta cu S.T. no tin rijbewijs. Fiscal a bisa cu e ta tuma S.T. na malo di a core bay despues di a dal e victima Croes. Tambe Fiscal a cuestiona e hecho cu S.T. tabata core sin rijbewijs. Fiscal a sigui bisa cu entretanto S.T. a haya rijbewijs. Fiscal a exigi 30 dia di prison, di cual 12 dia ta condicional cu un tempo di prueba di 2 aña. Esey ta nifica cu S.T. no mester bay sera den prison. Pa loke ta e auto cu a keda confisca, Fiscal a bisa cu e auto lo por wordo debolbe.
ABOGADO
Mr. Illes a bisa Hues cu S.T. ta admiti di a dal e homber Croes cu auto y core bay. E abogado a bisa cu S.T. ta lamenta masha loke a sosode. E abogado a sigui bisa cu ora di detencion di S.T., el a para responsabel pa loke el a haci. El a bisa cu S.T. a declara na Polis, cu el a spanta asina hopi cu el a core bay. El a bisa Hues cu S.T. ta lamenta hopi loke a pasa. El a bisa cu S.T. tin un trabao y ta haya e exigencia di Fiscal corecto.
SENTENCIA
Hues a sera tratamento di e caso y a dicta sentencia di biaha. Hues a bisa cu ta un hecho cu S.T. a dal e homber Croes cu auto y core bay. Hues a declara S.T. liber di e acusacion di a laga un homber desampara. Hues a bisa cu e ta compronde cu hende por reacciona asina di core bay pero e ta haya cu mester para responsabel y bay entrega su mes na Polis. Esey no a sosode y tambe cu S.T. a haya boet pa core sin rijbewijs pero awor tin rijbewijs. Hues ta haya e castigo exigi pa Fiscal na su lugar. Hues a condena S.T. na 30 dia di prison, di cual 12 dia ta condicional cu un tempo di prueba di 2 aña. Tambe cu e auto por wordo debolbe.
