Aruba ta fortifica cooperacion internacional y posicion strategico

April 11, 2026

Prome Minister Mike Eman durante reunion cu partnernan di Union Europeo
“Nos islanan ta Europa den lama Caribe, Europa den ocean Artico y ocean Pacifico”

Prome Minister Mike Eman a habri diasabra mainta e conferencia ministerial di OCTA (Overseas Countries and Territories Association). Esaki den conexion cu e 21 edicion di OCT – European Union Forum, un plataforma internacional pa dialogo entre Union Europeo y su Paisnan y Teritorionan Ultramarino (LGO). Prome Minister mr. Mike Eman hunto cu Vice-premier mr. Gerlien Croes cu tin e cartera di Relacionnan den Reino y Union Europeo como tambe Minister Plenipotenciario Mildred Schwengle ta anfrition di e forum aki cu ultimo biaha a tuma luga 9 aña pasa riba nos isla.

E prome mandatario a para keto riba dos tema central cu ta na enfoke. Prome, e fortalecemento di e organisacion OCTA. A base di discusionnan y acuerdo reciente, tin un direccion positivo pa sigura continuidad y eficiencia di e organisacion. OCTA ta di gran importancia pasobra e ta representa e punto principal di contacto diario cu Union Europeo.

“Pa Aruba y otro paisnan SIDS (Small Island Development States) e relacion cu Union Europeo ta esencial. Varios lider local ta enfrenta reto compleho pa maneha desaroyo social, salud publico, infrastructura y siguridad, tur den un contexto di costo operacional halto. Den e marco aki, cooperacion internacional ta un elemento clave pa logra desaroyo sostenibel.” Mike Eman a enfatisa durante e reunion cu el a presidi hunto cu otro diestres pais manera Aruba.

Un di e elemento cu realmente uni e paisnan participante ta nan identidad comun como isla. Cada dia, e bista riba e horizonte ta recorda tanto e reto nan como e oportunidadnan. E posicion geografico di e islanan ta crea vulnerabilidad, pero tambe un potencial unico pa crecemento y innovacion. E reunion di paisnan OCT (Overseas Countries and Territories) ta enfatisa e importancia pa identifica e proyectonan strategico cu por presenta n’e Union Europeo. No tur inversion — manera reparacion di caminda of brug — ta genera impacto duradero. Pa loke ta crea balor real, ta necesario pa enfoca riba iniciativanan cu ta fortalece relacionnan internacional y amplia oportunidad economico.

Un mensahe clave durante e reunion ta: e paisnan y teritorionan no ta solamente parti di Europa, nan ta representa Europa den diferente region di mundo. Den Caribe, Pacifico y Artico, nan ta ocupa un posicion di “front line”. E posicion aki mester wordo uza strategicamente pa crea proyecto di interes comun cu por beneficia tanto e region como Union Europeo.

Aruba, como ehempel a logra cooperacion di varios proyecto financia cu fondo di Union Europeo. E tipo di inversion aki no solamente contribui na infrastructura, pero tambe na fortalecemento di economia, cultura y identidad nacional.

Cu un vision cla y compromiso comparti, Aruba ta continua na posiciona su mes como un socio confiabel y un lider den cooperacion internacional, mirando cu determinacion pa un futuro sostenibel y inclusivo. E reunion Overseas Countries and Territories ta sigui durante fin di siman y dialuna lo tin e OCT-EU Forum y diamars un conferencia di inversionistanan.

Durante e ultimo añanan, Aruba a ricibi bishitanan importante, incluyendo e Prome Minister di Hulanda cu su delegacion y tambe un Secretario di Estado. E aña aki a cuminsa cu un conferencia grandi cu participacion internacional, unda lidernan politico, expertonan academico y invitadonan distingui a reuni na nos isla durante e Common Good Conference januari ultimo. Entre nan tabatin figura reconoci manera profesor di Universidad di Harvard y filosofo Michael Sandel, hunto cu lidernan di region manera e Prome Minister di Sint Maarten y representantenan di Gobierno di Corsou. Ademas riba 18 di maart Aruba a conmemora un momento importante, unda a ricibi bishita di Su Mahestad Rey Willem-Alexander, hunto cu gobernadornan, miembronan di parlamento y mas cu 60 invitado for di diferente parti di Reino Hulandes. E serie di evento aki a mustra e capacidad di nos pais pa organisa eventonan di un embargadura internacional.

Aruba ta fortifica cooperacion internacional y posicion strategico

Aeropuerto di Corsou evacua tras menasa di bom Turista perde su bida den incidente na lama na Mangel Halto

Castigo di añas di prison exigi pa grupo cu a haci 3 atraco cu violencia riba un dia

Chauffeur sin rijbewijs cu a dal peaton y core bay dilanti Hues Hues a ordena pa laga sospechoso den caso droga liber Hues a declara liber homber sospecha di a abusa di mucha menor di edad

Carlos Santiago OLY a comparti hopi conocemento di e plataforma “Athlete365”

Noticia Internacional 7 Januari 2026 Compilacion di entrada militar di Merca na Venezuela y reacciona di di venezolanonan Rond di mundo Regimen di Nicolas Maduro a cay

Tension entre Merca y Venezuela ta keda aumenta Noticia Internacional 21 November 2025

Articles

News

Suceso

Corte

Deporte

Salud

Internacional