Mas cu 165 mil kilogram di desperdicio colecta den prome siman di Zona di Desperdicio

June 12, 2026

Cifra ta confirma necesidad di comunidad pa haci nos isla limpi

Casi mil ciudadano a bin cu nan vehiculo pa deshaci di sushi

Solamente un siman despues di su apertura oficial, Zona di Desperdicio ta mustra resultado positivo y ta confirma cu Aruba tin un necesidad real pa mas facilidad cu ta permiti deshaci di sushi di un manera responsabel. E datonan compila durante e prome siman di operacion, di dialuna 1 di juni te cu diadomingo 7 di juni for di 7 or di mainta te cu 3 or di atardi, ta indica cu un total di 945 ciudadano a bin cu nan vehiculo pa bishita e facilidad na Barcadera. Durante e mesun periodo, 165.68 ton of 165 mil 680 kilogram di desperdicio a wordo entrega y procesa, pues a yena un total di 130 baki di sushi.

E resultado nan ta sigui riba e vision presenta durante e inauguracion oficial di e proyecto Aruba Limpi, un colaboracion entre Gobierno di Aruba, Aruba Tourism Authority (ATA) y Ecotech Aruba N.V. impulsa pa Ministerio di Turismo, Transporte y Labor mr. Wendrick Cicilia, cu como meta principal ta ofrece un solucion structural pa deshaci di desperdicio y contribui na un Aruba mas limpi y agradabel pa biba y bishita. Durante e apertura oficial di e facilidad, Prome Minister mr. Mike Eman a enfatisa cu hopi famia ta enfrenta reto ora nan mester deshaci di cantidad di sushi. Segun e Prome Minister, e costo y dificultad di deshaci di sushi acumula pa varios aña por representa un carga adicional p’e famianan cu ya caba ta haciendo varios sacrificio pa cubri nan gastonan diario. “Hopi famia ta haci gran sacrificio pa cubri nan gastonan diario. Ora cu un persona mester asumi gasto adicional pa deshaci di desperdicio, esey por bira un carga extra den nan cartera. Cu iniciativa aki nos ta crea un solucion practico cu ta contribui na dignidad y calidad di bida di nos pueblo.”

Fin di siman ta dia di haci limpi

E participacion registra durante e prome siman ta indica cu comunidad a brasa e iniciativa y ta dispuesto pa haci uzo di e facilidadnan cu ta promove un Aruba mas limpi y bunita. Diasabra 6 di juni tabata e dia cu mas movimiento, cu 191 vehiculo y 33.36 ton di desperdicio procesa. E cifranan ta mustra cu hopi residente ta probecha fin di siman pa haci nan entorno limpi.

Zona di Desperdicio ta construi rib’e exito di diferente edicion di Baki den Bario, iniciativa cu durante e ultimo aña a demonstra e compromiso di comunidad cu limpiesa y cuido di su entorno. Durante e inauguracion, Prome Minister Eman a recorda e entusiasmo cu comunidad a mustra durante e actividadnan di Baki den Bario. “Nos a mira durante Baki den Bario con nos pueblo a responde cu entusiasmo y compromiso. Esey ta confirma cu ora gobierno y comunidad traha hunto, resultado positivo ta sigui. Zona di Desperdicio ta construi rib’e mesun spirito di cooperacion y responsabilidad comparti.”

For di Baki den Bario pa Zona di Desperdicio

Poniendo e resultado actual di e exito di Zona di Desperdicio den perspectiva. Na final di aña 2025, e programa Baki den Bario a registra mas cu 800 ton di sushi durante 10 edicion organisa den diferente bario. Durante e campaña, mas cu 4.000 vehiculo a haci uzo di e iniciativa y mas cu 500 baki a wordo yena. Esaki ta nifica cu den solamente un siman, Zona di Desperdicio a atrae casi un 25% di tur e vehiculonan cu a participa den henter e campaña di Baki den Bario di aña pasa. E dato aki ta confirma cu e necesidad pa mas cu un facilidad permanente pa deshaci di sushi, pues nos comunidad ta aprecia e acceso continuo cu e Zona di Desperdicio ta ofrece. E cantidad significativo di sushi, foyo y otro material recogi durante Baki den Bario ya tabata indicando cu Aruba tin un demanda constante pa mira facilidad cu ta permiti deshaci di desperdicio. Cu 165.68 ton procesa den e prome siman di operacion, Zona di Desperdicio ta confirma e conclusion ey un biaha mas.

Pueblo tin anhelo pa mira su isla limpi

Gobierno ta mira e resultadonan como un paso importante den e esfuerso pa mehora calidad di bida den nos comunidadnan, mantene Aruba limpi y fortalece sostenibilidad. E vision pa futuro ta inclui amplia e concepto cu mas facilidad similar rond di Aruba, permitiendo cu mas bario por beneficia di e servicio y fortaleciendo aun mas e compromiso nacional cu un Aruba mas limpi, bunita y agradabel pa biba y bishita. Cu 945 vehiculo atendi y mas cu 165 ton di desperdicio colecta den solamente shete dia, e prome resultado nan ta confirma cu Zona di Desperdicio ta responde na un necesidad existente den nos comunidad y ta contribui n’e meta cu nos tur tin comparti, esta di mantene Aruba limpi pa nos tur.

E facilidad di Zona di Desperdicio ta situa riba tereno di Ecotech Freezone na Parkietenbos 53-A y ta habri di dialuna pa diadomingo for di 7 or di mainta te cu 3 or di atardi. Pa mas informacion bishita www.arubalimpi.com

Turista Americano ta fayece den Accidente di UTV na Black Stone Beach

Castigo di añas di prison exigi pa grupo cu a haci 3 atraco cu violencia riba un dia

Chauffeur sin rijbewijs cu a dal peaton y core bay dilanti Hues Hues a ordena pa laga sospechoso den caso droga liber Hues a declara liber homber sospecha di a abusa di mucha menor di edad

TEAMARU den preparacion pa Weganan Suramericano SantaFe2026

Carlos Santiago OLY a comparti hopi conocemento di e plataforma “Athlete365”

Noticia Internacional 7 Januari 2026 Compilacion di entrada militar di Merca na Venezuela y reacciona di di venezolanonan Rond di mundo Regimen di Nicolas Maduro a cay

Tension entre Merca y Venezuela ta keda aumenta Noticia Internacional 21 November 2025

Articles

News

Suceso

Corte

Deporte

Salud

Internacional