Pronto Balashi Beer Experience lo habri na Gloria

June 10, 2026

Experiencia e atraccion cultural mas nobo di Aruba, celebrando cerbes Balashi

E compleho di multi-entretenimento mas grandi di Aruba, Gloria, ta anuncia cu pronto e atraccion cultural mas nobo di nos isla lo habri su portanan: Balashi Beer Experience, cu ta programa pa habri den e ultimo kwartaal di e aña aki. Inicialmente a anuncia e proyecto na inicio di aña 2025, awo e experiencia a drenta su fase final di desaroyo cu inicio di e instalacionnan na e localidad. A celebra e logro emocionante aki cu instalacion di e emblema mas iconico di e atraccion: su tanki gigante di cerbes.

Gloria: E compleho di multi-entretenimento di Aruba

E futuro Balashi Beer Experience ta marca e siguiente capitulo pa e compleho multi-entretenimento Gloria. E atraccion ta responde na e demanda creciente pa atraccionnan “indoor” y cu airco na Aruba. E experiencia di 120 minuut lo añadi hopi balor di entretenimento y aumenta e tempo cu e bishitantenan ta pasa den e compleho, creando sinergia cu destinacionnan existente manera The Movies, Starbucks, PF Chang’s y Olive Garden, mientras cu ta fortalece Gloria como un destino completo pa un dia di salida.

Cera conoci cu brewmaster Buchi

E isla Caribense Aruba, un tempo yama como “Isla Inútil” door di e Spañonan pa “Isla Sin Uzo” — tin un di e historinanan di produccion di cerbes mas remarcabel na mundo. Hunto cu master brewer Buchi di Balashi, e bishitantenan ta descubri con Rubianonan a transforma e isla improbabel aki den luga di nacemento di un cerbes excepcional.

“E historia di origen di Balashi ta representativo pa cultura di ‘One Happy Island’. E ta refleha pasion, trabou duro, creatividad y e importancia di famia. Asina cu, mas cu un experiencia tocante un cerbes unico, e ta tambe un experiencia tocante Aruba y su pueblo caluroso y acogedor. Y diferente di otro experiencianan di marca di cerbes, manera Guinness Storehouse of Heineken Experience, e atraccion aki lo ta completamente tematisa,” segun Victor Schade, Creative Director di Sandenburg Experiences.

E experiencia walk-through ta consisti di 12 escena unico unda e bishitantenan lo topa cu temanan iconico di Aruba manera cas di cunucu, laman Caribense y Parke Nacional Arikok. Pa duna bida na e historia, e atraccion ta combina diferente tecnicanan, incluyendo contenido audiovisual live-action, proyeccionnan inmersivo, decoracion escenografico, efecto special, exhibicionnan interactivo y gameplay. Entrada pa e atraccion ta inclui dos Balashi gratis.

Un colaboracion di clase mundial

E proyecto ta un iniciativa di MetaCorp, e compania mas bieu na Aruba, cu un portfolio diverso di negoshinan riba nos isla y como tambe afo di Aruba. Pa expande e limite di entretenimento indoor na Aruba, MetaCorp a forma un aliansa cu un grupo di clase mundial di desaroyadonan renombra di atraccionnan inmersivo bou guia di Sandenburg Experiences.

Markus Konings, CEO di Sandenburg Experiences, a duna di conoce: “Nos a reuni algun di e actornan principal den industria di atraccionnan pa crea e experiencia di marca unico aki pa Caribe. Nos ta mira cu hopi entusiasmo pa ricibi esnan cu ta bishita nos isla, comunidad local di Aruba y profesionalnan di industria di entretenimento di Central y Latino America pa experimenta esaki personalmente.”

Oportunidad pa trabou

Cu e proyecto aki, separa for di e proceso di construccion, awo ta yega e momento cu mester recluta personal pa por sirbi como guia den e actividad cu lo atrae tanto turista como local. Tur esnan interesa, por solicita via e paginanan di red social di Gloria Aruba. “Nos tin un bon producto, un di e cerbesnan mas preferi di Caribe pero nos mester e talento local awo pa por expone na mundo henter, a traves di e walk-through. Na final tur Rubiano lo ta mas orguyoso di nos cerbes, cu ta un atraccion turistico riba su mes”, asina Eddie de Veer, CEO di MetaCorp a expresa.

Turista Americano ta fayece den Accidente di UTV na Black Stone Beach

Castigo di añas di prison exigi pa grupo cu a haci 3 atraco cu violencia riba un dia

Chauffeur sin rijbewijs cu a dal peaton y core bay dilanti Hues Hues a ordena pa laga sospechoso den caso droga liber Hues a declara liber homber sospecha di a abusa di mucha menor di edad

TEAMARU den preparacion pa Weganan Suramericano SantaFe2026

Carlos Santiago OLY a comparti hopi conocemento di e plataforma “Athlete365”

Noticia Internacional 7 Januari 2026 Compilacion di entrada militar di Merca na Venezuela y reacciona di di venezolanonan Rond di mundo Regimen di Nicolas Maduro a cay

Tension entre Merca y Venezuela ta keda aumenta Noticia Internacional 21 November 2025

Articles

News

Suceso

Corte

Deporte

Salud

Internacional