Minister Geoffrey Wever: Danki na posicion fuerte riba mercado financiero internacional, Aruba ta logra prestamo di 160 miyon dollar

May 21, 2026

Recientemente Gobierno di Aruba a sera un prestamo di USD 160 miyon riba mercado di capital internacional. E resultado ta historico. E nivel di 'country risk' ta e mas abou cu Aruba a logra den henter su historia.

E demanda di inversionistanan a supasa tur expectativa. Pa cubri un necesidad di USD 160 miyon, Aruba a ricibi mas cu USD 1 biyon den oferta. Esey ta siete biaha mas cu loke tabata necesario. E oferta enorme aki di fondo pa inverti den bonds di Aruba ta mustra cu inversionistanan professional ta reconoce Aruba como un producto financiero di bon calidad.

"E nivel di debe no ta subi. Tampoco e nivel di gasto di interes. Esaki no ta un debe nobo, pero un areglo nobo pa debenan di pasado cu ta caduca e aña aki," minister Geoffrey Wever a bisa.

E prestamo aki ta necesario pa por cubri debenan cu a wordo cera den pasado y cu ta caduca e aña aki. E nivel di debe di Aruba ta keda baha. E surplus di presupuesto ta permiti Aruba paga un parti di e debenan cu ta madura e aña aki. Pero e surplus no ta suficiente pa paga tur. Algun nos mester refinancia.

Un total di 39 institutonan financiero Americano y Europeo a participa y a pone fondonan disponibel. E prestamo tin un duracion di 10 aña y a wordo organisa pa medio di Citigroup Global Markets.

Pa prome biaha den su historia, inversionistanan a ofrece Aruba fondonan contra un 'country risk' di menos cu 2%. E ‘country risk’ premium ta loke ta refleha e opinion di inversionitanan despues cu nan evalua nos situacion economico y financiero. Un premium historicamente abou ta mustra cu inversionistanan, mescos cu tur tres rating agencies, ta impresiona cu e calidad di Aruba como producto financiero. Anteriormente e premium tabata entre 2.5% y 3.5%. E coupon di e prestamo a keda na 6.29%, reflehando e turbulencia geopolitico actual den mercado internacional.

E tres rating agencies — Standard & Poor's, Moody's y Fitch — a reconoce Aruba como un cliente di bon calidad cu investment grade. Mercado internacional ta confirma e mesun cos.

Mester remarca cu pa prome biaha, Aruba a atrae tambe inversionistanan fuerte for di Europa. "Esaki ta e prome resultado di un strategia pa haci Aruba un nomber atractivo den mercado financiero Europeo," minister Wever a señala. Esaki ta resultado concreto di esfuerso, vision y maneho di Minister Wever pa diversifica di riesgo riba tereno di financiamento di Aruba. Na dos occasion Minister Wever acompaña pa profesionalnan di Directie Financiën a biaha pa Europea pa presenta Aruba na inversionistanan Europeo y awe nos a logra ricibi diferente oferta di esakinan.

Parlamento di Aruba a autorisa e financiamento. Conseho di Minister di Reino tambe a duna su aprobacion.

"E confiansa di mercado den Aruba ta fuerte y ta creciendo. Nos finansas publico ta solido. Nos ta traha pa un Aruba duradero, responsabel y yen di oportunidad pa cada ciudadano," minister Geoffrey Wever a conclui.

Turista Americano ta fayece den Accidente di UTV na Black Stone Beach

Castigo di añas di prison exigi pa grupo cu a haci 3 atraco cu violencia riba un dia

Chauffeur sin rijbewijs cu a dal peaton y core bay dilanti Hues Hues a ordena pa laga sospechoso den caso droga liber Hues a declara liber homber sospecha di a abusa di mucha menor di edad

TEAMARU den preparacion pa Weganan Suramericano SantaFe2026

Carlos Santiago OLY a comparti hopi conocemento di e plataforma “Athlete365”

Noticia Internacional 7 Januari 2026 Compilacion di entrada militar di Merca na Venezuela y reacciona di di venezolanonan Rond di mundo Regimen di Nicolas Maduro a cay

Tension entre Merca y Venezuela ta keda aumenta Noticia Internacional 21 November 2025

Articles

News

Suceso

Corte

Deporte

Salud

Internacional