Articles
Aruba Marriott a expresa gratitud durante “Associate Appreciation Week”
Manera ta custumber di tur aña, Aruba Marriott Resort & Stellaris Casino a organisa un siman di actividad como parti di “Associate Appreciation Week”. E siman di aprecio a inicia dia 17 di november y a termina dia 22 di november ultimo.
Celebra den grandi
Reuella Berg, Director di HR Operations, a enfatisa cu siendo e compleho di hotel di mas grandi na Aruba, cu mas asociado y cu ta opera 24 ora pa dia, ta importante pa un siman pa aña para un rato keto y dedica tempo adicional na e asociadonan. Ta un siman pa relaha cu eventonan mas social pero tambe pa cera conoci miho cu coleganan trahando den e tres hotelnan y e casino.
Actividad pa comunidad
Pa Aruba Marriott Resort & Stellaris Casino ta importante tambe pa duna bek na comunidad. Arthur Santos, Director of Finance Operations, a expresa cu algun asociado a pasa Imeldahof pa celebra 30 aña cu e muchanan. Ademas di 30 aña di Aruba Marriott Resort & Stellaris Casino, nan ta celebra 26 aña di Care Foundation, cu a inicia na aña 1999. Mayoria di e fondonan di Care Foundation ta bin di parti di e asociadonan mes.
Hunga padel
Riba e di dos dia di actividad, pero den oranan di anochi, e asociadonan a hunga padel. Jason Zeng, Human Resources Manager, a duna di conoce cu e asociadonan a pasa un rato na Aruba Padel Club pa experencia Glow in the Dark Padel Event.
Mastermind
Riba diaranson a tuma luga “Morning Masterminds” den e ballroom di Aruba Marriott. Marylaine Feliciana, Director of Learning & Development, a comenta cu organisa un “game day” pa asina e asociadonan pasa un momento den bon ambiente.
Night Shift
Mas cu claro, pa Aruba Marriott ta importante pa tene cuenta riba e asociadonan cu ta traha den e oranan di anochi. Ben Figaroa, Casino General Manager, a conta cu riba diaranson anochi a celebra e “Associate Appreciation Week” caminda a expresa danki na e asociadonan pa nan trabou duro di henter aña. E actividad di diaranson tabata uno peculiar pasobra e tabata pa esnan cu ta traha shift di anochi, of pa esnan cu no ta haya un oportunidad den dia pa participa den e actividadnan.
Rato pa famia
Riba e di cuater di “Associate Appreciation Week” a organisa un “Family Movie Night”. Licielle
Hoek, Human Resources Supervisor, a splica cu a organisa un rato di pelicula den ballroom di Aruba Marriott Resort pa e asociadonan por experiencia un actividad hunto cu nan famia tambe.
Clausura
E ultimo actividad a tuma luga na Eagle Bowling. Luzdary Leest, Human Resources Manager, a comenta cu e asociadonan a gosa durante e ultimo evento. Leest ta invita tur esnan cu tin interes pa inicia nan carera den e sector hotelero pa bishita careers.marriott.com pa explora tur e vacaturanan cu tin habri. Tin vacatura pa tur interes y tur talento, aplica pa asina bo ta parti di e famia di Aruba Marriott.
Tocante Aruba Marriott Resort & Stellaris Casino
Aruba Marriott Resort & Stellaris Casino a habri na aña 1995 cu 411 camber y a añadi tres camber na aña 2018. Na aña 1999 a habri Ocean Club cu 311 camber y na aña 2004 a habri Surf Club cu 900 camber. Na tur, e famia di Marriott Aruba ta consisti di mas o menos 1300 empleado den servicio directo. E compleho di Marriott Aruba ta esun di mas grandi den henter Caribe, tanto den cantidad di camber como den cantidad di empleado.
