Buurtzorg : “Cuido sostenibel ta cuminsa na cas; inverti den cuido primario no ta un opcion, sino un necesidad

E rapportnan reciente di Inspeccion di Salud Publico tocante e riesgonan existente na casnan di cuido na Aruba ta subraya loke profesionalnan di salud ta señalando ya pa basta tempo: e presion riba e cadena di cuido ta aumenta di un manera structural. Segun Dalila Trinidad-Monte, miembro di directiva di Buurtzorg Caribbean, e conclusion ta cla:

“ Si nos kier pa e cuido sea sostenibel riba largo plazo, nos mester inverti den e cuido caminda e ta tuma luga: na cas, den bario, prome cu hospitalisacion bira necesario.”

Aumento di e demanda di cuido ta exigi un reforma structural

Aruba, mescos cu otro islanan di e region, ta enfrenta un desafio doble: na un banda, envehecimento di e poblacion y aumento di e demanda di cuido, y na otro banda, capacidad limita di e institucionnan di cuido intramural. Na mes momento, for di prome di januari 2027, legislacion nobo lo drenta na vigor cu ta destina pa regula - na un manera structural - cuido di largo duracion pa personanan di edad y patientnan cronico, estableciendo standaardnan di calidad mas exigente di dunamento di servicio di cuido y supervision. Dentro di e maneho actual pa personanan di edad na Aruba tambe ta pone enfasis riba autonomia , permanece na cas independientemente mas tanto tempo posibel y fortalecimento di e netwerk informal.

E avansenan aki den desaroyo di maneho ta exigi un fortalecimiento fundamental di e cuido primario y di enfermeria di bario.

Profesionalismo

Caminda institucionnan ta interveni ora situacionnan escala, cuido (enfermeria) di bario ta dirigi su esfuersonan hustamente riba prevencion, deteccion tempran y mantencion di autonomia.

“Un cuido adecua y personalisa no ta cuminsa cu admision na hospital, sino cu sosten na cas,” Mireille Eerdmans-Laaf - enfermera di Buurtzorg - ta afirma.

“Dor di detecta señalnan na tempo - por ehemplo na personanan vulnerabel of patientnan cronico - por preveni deterioro. Esaki no solamente ta reduci presion riba hospital y cas di cuido, sino tambe ta mehora calidad di bida.”

Buurtzorg ta traha cu ekiponan (teamnan) chikito y independiente di enfermeranan altamente cualifica, cu ta pone prevencion, deteccion tempran y mantencion di autonomia central.

Profesionalnan di enfermeria di bario ta usa instrumento di evaluacion profesional, ta colabora di manera multidisciplinario y ta aplica un enfoke dirigi riba e persona, orienta riba autosuficiencia y solucionnan di cuido sostenibel.

Construi hunto na un red di sosten mas amplio

Rapportnan reciente ta indica cla cu cuido na Aruba a yega na un punto critico. Segun Buurtzorg, a yega e momento pa evalua criticamente e structuranan existente y pone cooperacion na centro.

“No ta trata di competencia, sino di responsabilidad comparti,” Trinidad-Monte ta señala.

“E desafio di cuido cu Aruba ta enfrentando ta exigi integracion di expertisio, fortalecimento di cuido primario y un dialogo habri entre gobierno, institucionnan y dunadonan di cuido.”

P'esei, Buurtzorg ta aboga pa:

I. Un fortalecimento aducional di enfermeria di bario como base di e cadena di cuido

II. Un mihor integracion entre cuido na cas (thuiszorg), dokter di cas y institucionnan intramural

III. Inversionnan den prevencion y deteccion tempran

IV. Armonizacion di maneho cu bista riba legislacion nobo cu lo drenta na vigor na 2027

Humano, seguro y sostenibel

Un cuido primario solido no solamente ta contribui na mihor resultado di salud, sino tambe na gasto di cuido manehabel riba largo plazo. Experencia internacional ta demostra cu inverti den cuido (enfermeria) na cas ta conduci na menos hospitalisacion, estadianan mas cortico y un satisfaccion mas halto di cliente.

Eerdmans-Laaf ta subraya un biaha mas cu Buurtzorg, banda di cuido y cuido di bario, ta aplica un enfoke holistico orienta riba e situacion integral di cas .

“E futuro di cuido na nos islanan no ta depende exclusivamente di ampliacion di capacidad, sino den organisa e cuido di un manera mas inteligente rondo di e cliente,” Trinidad-Monte ta conclui.

“Solamente pa medio di inverti huntu den profesionalismo den e barionan, nos por mantene cuido na Aruba humano, seguro y pagabel .

Articles

News

Suceso

Corte

Deporte

Salud

Internacional

Buurtzorg : “Cuido sostenibel ta cuminsa na cas; inverti den cuido primario no ta un opcion, sino un necesidad

Cookie Consent