MEP 55 aña di lucha, speransa y progreso pa Aruba

E aña aki ta marca un momento special den historia di Aruba: 55 aña di partido Movimiento Electoral di Pueblo (MEP). Loke a cuminsa manera un soño di curashi di un grupo chikito di Arubiano, a crece te bira un movimiento popular cu a cambia e destino di nos pais pa semper.

Dia 9 di februari 1971, Gilberto “Betico” Croes a funda partido MEP cu un conviccion cla: Aruba mester por dicidi riba su propio futuro. Den un tempo cu hopi hende a pensa cu e idea ey tabata imposibel, MEP a mustra e balor di kere den dignidad, autodeterminacion y husticia social. E conviccion ey a toca e curason di e pueblo.

E añanan setenta y ochenta a wordo marca pa lucha y sacrificio. Un punto halto den nos historia tabata e gran mobilisacion popular y e welga historico di 1977, caminda miles di Arubiano a lanta nan bos pa exigi un status propio. E determinacion colectivo ey a conduci dia 1 di januari 1986 na realisacion di Status Aparte – un hecho historico cu a duna Aruba autonomia politico, un Parlamento propio y un Gobierno propio. Un soño a bira realidad.

Lamentablemente Betico Croes mes no a mira e soño wordo realisa, pero Nel Oduber a gara e bandera na 1986 y a sigui cu e lucha. Cu e determinacion sin igual, a logra scrap e fecha di independencia, pa sigura cu Aruba ta mantene e Status Aparte. Desde e momento ey, MEP a sigui ta un forsa central den e construccion di nos pais. E partido a participa den varios gobierno, a pone enfasis riba progreso social, educacion, empleo y igualdad di oportunidad, y semper a keda fiel na bos di e pueblo, tambe den tempo di oposicion y reflexion interno.

Un capitulo nobo a wordo scirbi na 2017, ora Evelyn Wever-Croes a haci historia como e prome hende muhe Prome Ministro di Aruba. Bou di su liderato, e pais a wordo guia door di desafio sin precedencia, incluyendo e pandemia di COVID-19, cu enfasis riba solidaridad, resistencia y politica orienta riba futuro. Su periodo como Prome Ministro no solamente a simbolisa renovacion, pero tambe e vigencia di e idealnan di MEP.

Pa conmemora e hecho particular aki, dia 25 di januari ultimo den Cede di MEP, a desvela un cuadra di e tres lidernan, Betico Croes dfm, Nel Oduber y Evelyn Wever-Croes. Despues di 55 aña, Movimiento Electoral di Pueblo ta mas cu un partido politico. Ta un historia bibo di hende comun cu hunto a logra cambionan extraordinario. Ta un recordatorio cu progreso no ta bin naturalmente, pero ta wordo construi cu balor, vision y compromiso.

Pa e generacion hoben, e jubileo aki ta un invitacion: pa sa di unda nos ta bin, pa pensa critico riba unda nos ta, y pa participa activamente den construccion di e Aruba di mayan. E historia di MEP ta mustra cu un idea, sosteni pa e pueblo, por cambia un pais.

CHARLA 40 AÑA STATUS APARTE

Pa celebra e hecho grandi aki, partido MEP ta invita comunidad en general pa un charla hopi special cu dos ex prome minister, Nel Oduber y Evelyn Wever-Croes dialuna 9 di februari, 7or pa 9or pm na Cede di MEP.

MEP – 55 aña. Un lucha cu a cambia Aruba. E destino ta sigui den man di nos pueblo.

Articles

News

Suceso

Corte

Deporte

Salud

Internacional

MEP 55 aña di lucha, speransa y progreso pa Aruba

Cookie Consent