Articles
Fundacion Rancho ta organisa biahe familiar/cultural pa La Guajira
E relacionnan humano entre Peninsula di La Guajira, Colombia, y isla di Aruba ta data for di tempo inmemorabel. Hopi prome cu e Spañonan a pone pia riba e teritorionan aki di Caribe ya tabata existi conexion, tambe den materia di idioma, entre e Caquetionan di e islanan ABC y e Nacion Wayúu na Peninsula di La Guajira, sin cu ainda tabata existi ni Colombia ni Venezuela.
Ta conoci, por ehempel, cu despues, tempo cu e Spañonan a cuminsa comercio di perla di Lama Caribe, tanto na Cubagua, Venezuela, como na Cabo de la Vela na La Guajira, nan tabata busca specificamente buceado Caquetio pa sambuya pa busca perla, pasobra nan tabata bon buceado.
Den tempo moderno, ya cuminsando for di final di siglo 19 y cuminsamento di siglo 20 persona individual of den grupo (familiar) tabata migra di un pa otro parti. Tambe ta conoci cu ya den siglo 19 a trece persona Wayúu pa traha aki na Aruba, sea como persona sclavisa of como persona tuma di famia y adopta, algo cu a sigui tambe na cuminsamento di siglo 20.
Den curso di siglo 20 hopi residente di ambos teritorio a intercambia nan biba y a bay establece nan mes na e otro teritorio. Asina, na cuminsamento di siglo 20, prome cu binida di Lago, hende biba na Aruba a establece nan mes na diferente luga na costa di Colombia, en especial La Guajira y Departamento di Magdalena, caminda hopi a bay traha na e plantacionnan di bacoba di e compania Mericano United Fruit Company.
Cu establecemento di Lago y crecemento economico di Aruba hopi ta esnan cu mas tanto di La Guajira, pero tambe di otro partinan di costa di Colombia, a bin busca un miho bida y porvenir na Aruba for di den añanan trinta di siglo pasa. Resultado di esey tabata cu aki na Aruba ta existi awendia un grupo masha grandi di persona cu tin nan raiz den e pampanan di La Guajira, masha hopi specificamente di Riohacha, su capital.
En bista cu ta existi interes di parti di hopi di e descendientenan ey di famia Guajiro na Aruba pa bay bek na nan raiz pa conoce y reconoce nan ancestronan y nan famianan, Sr. Ramon Todd Dandaré, e mes un Riohachero neto, a acerca Fundacion Rancho cu e peticion pa organisa un biahe di caracter familiar y alabes cultural pa tanto e descendientenan Guajiro interesa como otro persona Arubiano of residencia na Aruba interesa por bishita La Guajira, cu e promenan bayendo bek na nan raiz pa topa famia y bolbe forma un conexion familiar nobo.
Fundacion Rancho, sin perde pa gana, y den colaboracion cu Fundacion InspirARTE, lidera pa Sra. Maria Cabarcas Aguilar na Riohacha, a uni forsa y a tuma e iniciativa pa organisa un biahe manera desea cu a titula Retorno a las Raíces - BEK NA RAIZ, programa pa tuma luga di dia 29 di april pa dia 6 di mei 2026, cu e idea di haci un vuelo directo di Aruba pa Riohacha y vice versa pa medio di un avion fleta (gecharter) pa haci e recorido ey, tur esaki dependiendo di e cantidad di participante. Tambe e dos organisacionan ta hincando un programa masha interesante y atractivo den otro pa e participantenan no solamente bolbe topa nan famia na Riohacha, sino tambe pa nan conoce mas di e cultura di La Guajira den e propio entorno Guajiro mes, cu e idea tambe pa nan intercambia nan conocemento y experiencia di nan bida na Aruba cu diferente persona (tanto famia como otro hende) cu ta biba den e ambito cultural di Riohacha y La Guajira.
Pa tal motibo y pa medio di esaki Fundacion Rancho ta invita tur descendiente Guajiro y otro persona interesa pa participa na e biahe familiar/cultural aki na un reunion di informacion cu lo tuma luga den Sala Diamanta di Biblioteca Nacional Aruba dialuna dia 22 di december pa 5:00 or di atardi. Tur persona interesa ta bon bini na e reunion informativo aki.
